ជារៀងរាល់ឆ្នាំ ក្នុងថ្ងៃបុណ្យ Valentine មជ្ឈមណ្ឌលសង្គ្រោះសត្វមួយកន្លែងនៅសហរដ្ឋអាមេរិក បានធ្វើការផ្ដល់សេវាដ៏ទាក់ទាញមួយដែលភ្ញៀវអាចចាយប្រាក់ត្រឹម ៥ ដុល្លារសរសេរឈ្មោះសង្សារចាស់របស់ពួកគេលើនំឃុកឃីរួចបោះទៅឱ្យឆ្កែចចកស៊ីជាចំណី។
សេវាកម្មសរសេរឈ្មោះសង្សារចាស់លើនំឃុកឃី រួចបោះទៅឱ្យឆ្កែចចកស៊ីក្នុងថ្ងៃ Valentine នេះ គឺជាសកម្មភាពដ៏ពេញនិយមប្រចាំឆ្នាំនៅមជ្ឈមណ្ឌល់សង្គ្រោះសត្វ T&D ដែលមានទីតាំងស្ថិតនៅក្រុង Middleburg រដ្ឋ Pennsylvania សហរដ្ឋអាមេរិក។ តាមការបញ្ជាក់ពីម្ចាស់សួនបានរៀបរាប់ថា៖ «បើសិនជាអ្នកស្អប់មិត្តស្រី មិត្តប្រុសចាស់ ស្អប់មេ ស្អប់ប្ដីស្អប់ប្រពន្ធ ឬសូម្បីតែស្អប់ភ្ញៀវដែលអ្នកផ្ដល់សេវាកម្មឱ្យ អ្នកអាចចំណាយប្រាក់ត្រឹមតែ ៥ ដុល្លារ នោះពួកយើងនឹងធ្វើការសរសេរឈ្មោះរបស់ពួកគេតាមអ្វីដែលអ្នកចង់បានលើនំឃុកឃីរូបមនុស្ស រួចឱ្យអ្នកបោះវាទៅឱ្យឆ្កែចចកស៊ីក្នុងថ្ងៃ Valentine»។
ម្ចាស់សួនបានបន្ថែមទៀតថា៖ «ពួកយើងទទួលបានភ្ញៀវមកពីគ្រប់ទិសទីក្នុងប្រទេស ហើយខាងសួនគឺទទួលបានការកុម្មង់នំឃុកឃីប្រមាណជា ២០០ នំជារៀងរាល់ឆ្នាំ។ នំឃុកឃីនោះគឺជាចំណីដ៏ឆ្ងាញ់សម្រាប់ឆ្កែចចក ហើយក៏ជារបស់មួយដែលភ្ញៀវចូលចិត្តផងដែរ។ វាញ៉ាំងបរិយាកាសថ្ងៃបុណ្យមួយនេះឱ្យកាន់តែសប្បាយខ្លាំងឡើង»។
អ្វីដែលរឹតតែពិសេសនោះគឺថា រាល់ថវិកាដែលទទួលបានគឺនឹងបានយកទៅសម្រាប់ជួយសង្គ្រោះ និង មើលថែសត្វក្នុងសួនទាំង ៣០០ ក្បាល៕
