ស្ត្រីអាយុ ៥៨ ឆ្នាំម្នាក់នៅខេត្ត Henan ប្រទេសចិន កំពុងធ្វើឱ្យមហាជនអ្នកលេងបណ្ដាញសង្គមក្នុងស្រុកភ្ញាក់ផ្អើលជាខ្លាំង ក្រោយដឹងថារូបគាត់បានចំណាយប្រាក់ចំនួន ៦២ ០០០ យ័ន (ប្រមាណ ៨៦០០ ដុល្លារ) លើការកែសម្ផស្សលុបស្នាមជ្រីវជ្រួញលើមុខ ព្រោះតែជឿថាវាជាសញ្ញានាំរឿងអាក្រក់ដល់កូនៗ និង ធ្វើឱ្យប្ដីមានស្រី។
ហេតុការណ៍នេះដែរបានកើតឡើងកាលពីថ្ងៃទី ១១ ខែសីហា ឆ្នាំ ២០២៥ កន្លងទៅ នៅពេលស្ត្រីចំណាស់ខាងលើបានទៅកាន់គ្លីនិកកែសម្ផស្សមួយកន្លែងក្បែរផ្ទះតាមការណែនាំរបស់ស្ត្រីម្នាក់ដែលជាម្ចាស់គ្លីនិកនោះ។ នៅគ្លីនិកនោះ គ្រូពេទ្យបាននិយាយថា ស្នាមជ្រួលនៅជ្រុងភ្នែករបស់គាត់ចេញជារាងដូចជើងក្អែក ដែលជាសញ្ញាបញ្ជាក់ថាប្ដីលួចផិតមានស្រី។ ពួកគេណែនាំឱ្យគាត់ធ្វើការលុបបំបាត់ស្នាមជ្រួចនោះចេញ ដើម្បីបិទផ្លូវអាក្រក់ដែលបម្រុងនឹងកើតឡើងលើប្ដីរបស់គាត់។
បន្ថែមពីនេះ គ្រូពេទ្យនោះបានលើកឡើងនូវស្នាមជ្រួញចន្លោះចិញ្ចើមទៀត ដោយគេនិយាយថានេះជាសញ្ញានាំរឿងមិនល្អដល់កូនៗ មិនបញ្ឈប់ត្រឹមហ្នឹងទេ គ្រូពេទ្យនោះថែមទាំងលើកឡើងពីខ្ទង់ច្រមុះរបស់គាត់ដែលទាបមិនសូវមាន ហើយតម្រូវឱ្យកែកុនដើម្បីបើកផ្លូវឱ្យសំណាង និង ទ្រព្យហូរចូល។
ការណែនាំរបស់គ្រូពេទ្យទាំងនេះបានធ្វើឱ្យស្ត្រីរូបនោះជឿលង់ ហើយក៏សម្រេចចិត្តដកលុយបង់ថ្លៃសាលារបស់ចៅទៅចាយលើការកែកុនមុខមាត់នេះ។ រឿងរ៉ាវមួយនេះដែរ បានក្លាយជាប្រធានបទក្ដៅគគុកនៅបណ្ដាញសង្គមប្រទេសចិន ដោយមហាជនជាច្រើនបញ្ចេញមតិរៀងៗខ្លួន ខ្លះថាគាត់មានជំនឿងប់ងល់ពេក ខណៈអ្នកខ្លះទៀតរិះគន់ទៅខាងគ្លីនិកដែលទាញប្រយោជន៍ពីមនុស្សចាស់បែបនេះ៕
