ឈរជិតមិត្តភក្ដិ ឃើញខ្លួនឯងខ្ពស់ដូចយក្ស ខឹងចិត្តពេក នារីវ័យ ៣០ ឆ្នាំម្នាក់ ចាយលុយ ២ ម៉ឺនដុល្លារ កា-ត់ឆ្អឹងជើងចោលឱ្យបានកម្ពស់ទាបស្មើគេឯង

នារីម្នាក់ឈ្មោះ Amber Berrington បានចំណាយប្រាក់ ២ ម៉ឺនដុល្លារ ទៅធ្វើការវះកាត់ឆ្អឹងភ្លៅនៅប្រទេសតួកគី ដើម្បីឱ្យនាងអាចមានកម្ពស់ទាបជាងមុន ៤ សង់ទីម៉ែត្រ ព្រោះតែនាងតូចចិត្តនឹងខ្លួនឯងជាមនុស្សស្រី តែមានកម្ពស់ខ្ពស់ដល់ ១.៧៣ ម៉ែត្រ។

នារីវ័យ ៣០ ឆ្នាំខាងលើនេះដែរ ជាអ្នកជំនាញខាងធ្វើធ្មេញ (dental technician) នៅចក្រភពអង់គ្លេស។ នាងតែងតែមានអារម្មណ៍ថា ខ្លួនឯងដូចយក្ស ពេលនៅក្នុងចំណោមមិត្តភក្តិ ហើយនាងគឺគ្រាន់តែចង់មានកម្ពស់ទាបដូចគេរាល់គ្នាដែរ។

ក្រោយមក នាង Amber ក៏បានរកឃើញមន្ទីរពេទ្យមួយនៅប្រទេសតួកគី ដែលជំនាញក្នុងការវះកាត់បន្ថយកម្ពស់។ វិធីសាស្ត្ររបស់គេគឺត្រូវកាត់ផ្នែកមួយនៃឆ្អឹងភ្លៅចេញ បន្ទាប់មកតភ្ជាប់ និង កែខៃវាដោយប្រើដែក។ ក្រោយការវះកាត់ អ្នកជំងឺគឺទាមទារពេលរាប់ខែទម្រាំអាចដើរបានធម្មតាវិញ។

ជាអ្វីដែលនាងចង់បាន ទើបកាលពីខែកក្កដា ឆ្នាំ ២០២៣ កន្លងទៅ នាង Amber ក៏បានហោះទៅក្រុង Istanbul ទទួលការវះកាត់ដោយជោគជ័យ ទទួលបានកម្ពស់ទាបជាងមុន ៤ សង់ទីម៉ែត្រ។ នាងបាននិយាយទាំងរីករាយថា៖ «មនុស្សជាច្រើនគិតថាខ្ញុំឆ្កួត តែពួកគេមិនដឹងថាកម្ពស់របស់ខ្ញុំបានកំណត់ជីវិតខ្ញុំទាំងមូលនោះទេ។ ឥលូវ ខ្ញុំមិនចាំបាច់ត្រូវខ្វាយខ្វល់ពីវាទៀតនោះទេ»៕