បើនិយាយដល់ថ្ងៃនៃក្ដីស្រឡាញ់ ឬ Valentine’s day ប្រិយមិត្តជាច្រើនប្រាកដជានឹកដល់ថ្ងៃ ១៤ កុម្ភៈមិនខាន។ យ៉ាងណាមិញ ប្រិយមិត្តមួយចំនួនអាចនឹងមិនដឹងឡើយថា ថ្ងៃទី ១២ កុម្ភៈ ដែលជាថ្ងៃចុងក្រោយនៃចូលឆ្នាំចិន គឺជាបុណ្យនៃក្ដីស្រឡាញ់ប្រចាំប្រទេសចិន។
ក្នុងឱកាសទិវានៃក្ដីស្រឡាញ់នេះហើយ អតីតតារាស្រីប្រចាំទូរទស្សន៍ TVB នាង Nancy Wu បានធ្វើឱ្យអ្នកគាំទ្រ ក៏ដូចជាមិត្តៗរួមអាជីពរំភើបជំនួសក្រោយរូបនាងបានធ្វើការបង្ហាញមុខគូស្នេហ៍ជាផ្លូវការលើបណ្ដាញសង្គម Instagram។
ក្នុងថ្ងៃ ១២ កុម្ភៈ នោះ Nancy បានធ្វើការបង្ហោះរូបមួយសន្លឹកដែលជារូបនាង និង គូស្នេហ៍ឈរជិះស្គីលើទឹកកក និង មួយទៀតជាវីដេអូរបស់ពួកគេអង្គុយយោលជើងខណៈកំពុងជិះកន្ត្រកយោង។
នៅក្រោមរូបភាព និង វីដេអូ តារាស្រីវ័យ ៤៣ ឆ្នាំរូបនេះបានសរសេរសារយ៉ាងផ្អែមល្ហែមថា៖ << រីករាយថ្ងៃបុណ្យបង្ហោះគោម បងសំឡាញ់>>។ ក្រោយរូបភាពបានបង្ហោះ ឃើញថាមានមហាជនជាច្រើន ក៏ដូចជាមិត្តៗសិល្បៈជាមួយគ្នា បានចូលទៅខមមិនអបអរនាងព្រោងព្រាត។
គួរបញ្ជាក់ថា កាលពីឆ្នាំទៅ Nancy បានធ្លាប់ប្រកាសដែរថារូបនាងលែង single តទៅទៀតហើយ ប៉ុន្តែពេលនោះនាងមិនបានទម្លាយពីអត្តសញ្ញាណ និង មុខមាត់គូស្នេហ៍នោះឡើយ។ ទើបតែថ្មីៗនេះ នាងបានទម្លាយច្បាស់ៗថា សង្សាររបស់នាងជាវេជ្ជបណ្ឌិតផ្នែកសម្រស់ម្នាក់ដែលមកពីគ្រួសារដ៏ស្តុកស្តម្ភមួយ៕
ប្រភព៖ 8days
