ប្រទេសជប៉ុន បានរងការគំរាមកំហែងពីការផ្ទុះឆ្លងនៃជំងឺគ្រុនផ្ដាសាយតាំងពីចុងឆ្នាំ ២០២៤ មកម្ល៉េះ ដែលបណ្ដាលឱ្យសាលារៀនជាច្រើនក្នុងប្រទេសត្រូវបង្ខំបិទទ្វារផ្អាកជាបណ្ដោះអាសន្ន ខណៈមន្ទីរពេទ្យសឹងពាសពេញប្រទេសក៏កំពុងមានអ្នកជំងឺច្រើនលើសលប់ ឯថ្នាំព្យាបាលក៏កំពុងតែជិតអស់ពីស្តុកថែមទៀត។
ក្នុងទីក្រុងធំៗដូចជាក្រុង Tokyo, Osaka និង Hokkaido ចំនួនករណីអ្នកឆ្លងជំងឺគ្រុនផ្ដាសាយបានកើនឡើងទ្វេដងក្នុងមួយសប្ដាហ៍។ ខេត្ត Nara ក៏ឃើញថាមានការកើនឡើងខ្ពស់ខ្លាំងដូចគ្នា ដោយអត្រាអ្នកកើតជំងឺផ្ដាសាយបានហក់ឡើងរហូតដល់ជិត ៣០០%។ សាលារៀនប្រមាណជាង ១៤០០ កន្លែងពាសពេញប្រទេសជប៉ុនត្រូវបានប្រកាសបិទជាបណ្ដោះអាសន្ន ដើម្បីជាការការពារការរាលដាលឆ្លងនៃជំងឺផ្ដាសាយដែលកំពុងប៉ះពាល់យ៉ាងធ្ងន់ធ្ងរលើក្មេងៗសិស្សសាលា។ ការផ្អាកបិទសាលាជាបណ្ដោះអាសន្ននេះដែរ ក៏កំពុងប៉ះពាល់ខ្លាំងដល់ពលរដ្ឋជាច្រើន ជាពិសេសឪពុកម្ដាយដែលជាអ្នកធ្វើការដែលត្រូវពឹងលើសាលាក្នុងការងាយស្រួលបំពេញការងារប្រចាំថ្ងៃ។ ការផ្អាកសាលាបែបនេះ ធ្វើឱ្យពួកគេជួបផលលំបាកយ៉ាងខ្លាំងដោយត្រូវបែងចែកពេលធ្វើការងារផង និង ត្រូវយកពេលមើលថែកូនៗផង។
បើក្រឡេកនៅខាងតំបន់ជនបទវិញ ស្ថានភាពគឺកាន់តែអាក្រក់ជាងនេះទៅទៀតដោយសារតែមន្ទីរពេទ្យក្នុងតំបន់អស់កន្លែងមើលថែអ្នកជំងឺ ដោយទីក្រុងតូចៗខ្លះបានរាយការណ៍ថា ពួកគេជួបការលំបាកខ្លាំងក្នុងការទប់ទល់ការរាតត្បាតនៃជំងឺផ្ដាសាយនេះណាស់ដោយសារតែថ្នាំចាំបាច់មួយចំនួនគឺកំពុងខ្វះអស់ពីស្តុក។ មិនថាតំបន់ជនបទទេ មន្ទីរពេទ្យនៅទីក្រុងធំៗក៏កំពុងមានអ្នកជំងឺច្រើនលើសលប់ដូចគ្នា ជាក់ស្ដែងនៅគ្លីនិក Ito Ouji Kamiya នាទីក្រុង Tokyo លោកវេជ្ជបណ្ឌិត Hirohito បានទម្លាយថា ចំនួនអ្នកជំងឺគឺកើនឡើងគុណនឹង ៥ ក្នុងមួយសប្ដាហ៍។ ករណីឆ្លងផ្ដាសាយជាង ៥០ ករណីត្រូវបានរកឃើញក្នុងពេលត្រឹមមួយសប្ដាហ៍ រហូតខាងគ្លីនិកត្រូវបង្ខំបញ្ជូនអ្នកជំងឺទៅខាងមណ្ឌលសុខភាពផ្សេងៗទៀត ព្រោះតែមិនមានកន្លែងព្យាបាលគ្រប់គ្រាន់។
លោកវេជ្ជបណ្ឌិត Hirohito បានសង្កត់បញ្ជាក់ទៀតថា ទោះជាការផ្ទុះឆ្លងជំងឺគ្រុនផ្ដាសាយតែងតែកើតមានឡើងនៅក្នុងខែមករាក៏ពិតមែន ប៉ុន្តែចំនួនអ្នកជំងឺបច្ចុប្បន្នគឺខ្ពស់លើសការរំពឹងទុកទៅទៀត ដែលធ្វើឱ្យអ្នកជំនាញមានការព្រួយបារម្ភថា វីរុសនេះអាចនឹងផ្ទុះរាតត្បាតក្នុងកម្រិតដែលមិនធ្លាប់មានពីមុនក្នុងពេលប៉ុន្មានសប្ដាហ៍ទៅមុខទៀត។
ចំណុចសំខាន់បំផុតដែលប្រឈមក្នុងការផ្ទុះឆ្លងផ្ដាសាយក្នុងប្រទេសនេះគឺកង្វះថ្នាំព្យាបាលសំខាន់ៗទ្រង់ទ្រាយធំដូចជា ថ្នាំបំបាត់ក្អក និង ថ្នាំអង់ទីប៊ីយូទិក ជាដើម។ ជាក់ស្ដែង ឱសថស្ថានមួយកន្លែងឈ្មោះ Ariake Family ដែលមានទីតាំងនៅក្រុង Tokyo បានរាយការណ៍ថា សេរ៉ូក្អក និង ថ្នាំអង់ទីប៊ីយូទិកសម្រាប់ក្មេងៗក្នុងឱសថស្ថានខ្លួនគឺបានដាច់ស្តុកអស់ទាំងស្រុង។
គួរឱ្យដឹងថា ការផ្ទុះឡើងនៃជំងឺគ្រុនផ្ដាសាយនេះដែរ ក៏បានប៉ះពាល់ធ្ងន់ធ្ងរទៅលើសេដ្ឋកិច្ចក្នុងប្រទេសជប៉ុនដូចគ្នា។ សាលាត្រូវបានបិទ ហើយបុគ្គលិកមួយចំនួនក៏មិនអាចទៅធ្វើការបាន ចំណែកវិស័យទេសចរណ៍វិញក៏រងការប៉ះពាល់ខ្លាំងដូចគ្នា ជាពិសេសអំឡុងពេលបុណ្យចូលឆ្នាំចិននេះ ដែលអ្នកទេសចរជាច្រើនមិនហ៊ានចង់ទៅលេងជប៉ុនដោយសារក្ដីបារម្ភចំពោះសុខភាពរបស់ពួកគេ៕
