ថ្មីៗនេះ មានករណីរបស់បុរសម្នាក់ក្នុងប្រទេសចិនត្រូវទទួលការព្យាបាលជាបន្ទាន់ ក្រោយរូបលោកកើតអាការលៀនក្រសាល់គូទ និង ធ្លាក់ឈាមធ្ងន់ធ្ងរខណៈពេលកំពុងចូលបន្ទប់ទឹក។
តាមព័ត៌មានបានឱ្យដឹងថា បុរសជាអ្នកជំងឺខាងលើមានវ័យ ៣៣ ឆ្នាំ ដោយខណៈពេលកំពុងអង្គុយលើបង្គន់ ភ្លាមៗលោកក៏មានការឈឺចាប់ខ្លាំងហើយក៏មានឈាមធ្លាក់មកយ៉ាងច្រើនចេញពីរន្ធគូទ ដោយក្រោយមកក៏ឃើញក្រសាលគូទធ្លាក់ចេញមកក្នុងប្រវែងរហូតប្រមាណជា ១៣ សង់ទីម៉ែត្រ។ ក្រោយការពិនិត្យ គ្រូពេទ្យរកឃើញថាបុរសរូបនោះកើតមានអាការធ្លាក់លៀនក្រសាល់គូទកម្រិតទី ៣ ដែលជាកម្រិតធ្ងន់ធ្ងរបំផុត។ ប្រសិនបើមិនទទួលបានការព្យាបាលត្រឹមត្រូវនោះទេ ស្ថានភាពអ្នកជំងឺនឹងក្លាយជាធ្ងន់ធ្ងររហូតដោយគ្រាន់តែក្អកខ្លាំងក៏អាចឱ្យលៀនធ្លាក់មកវិញទៀតដែរ។
ចំពោះមូលហេតុវិញ អំឡុងពេលទទួលការព្យាបាល ខាងវេជ្ជបណ្ឌិតបានសួរទៅកាន់បុរសជាអ្នកជំងឺពីប្រវត្តិជំងឺ និង ទម្លាប់របស់គេ និង ទើបដឹងថា បុរសរូបនោះតែងតែទម្លាប់អង្គុយច្រហោងលើបង្គន់យូរៗម៉ោង ចុចទូរស័ព្ទមើលវីដេអូខ្លី។ រាល់ពេលលោកចូលអង្គុយក្នុងបន្ទប់ទឹកម្ដងៗ យ៉ាងហោចណាស់ក៏ប្រើពេលពី ១ ម៉ោង ទៅ ២ ម៉ោងដែរ។
ក្រោយករណីរបស់បុរសខាងលើនេះ ខាងវេជ្ជបណ្ឌិតបានធ្វើការណែនាំឱ្យគ្រប់គ្នាគួរតែកំណត់ពេលវេលាចូលបន្ទប់ទឹករបស់ខ្លួនមកត្រឹម ៥ ទៅ ១០ នាទីបានហើយ។ ប្រសិនបើយូរលើសជាង ១០ នាទី អាចបណ្ដាលឱ្យប្រឈមនឹងជំងឺឫសដូងបាត និង អាការលៀនធ្លាក់ក្រសាលគូទនេះជាដើម៕
