ជីវិតធ្លាក់ដល់បាត! ម៉ូដែលស្រីល្បីម្នាក់នៅអាមេរិក ធ្លាក់ខ្លួនដើរអនាថាតាមផ្លូវ រើកកាយតាមធុងសំរាមរកម្ហូប និង ខោអាវស្លៀកពាក់ ក្រោយលែងលះស្វាមី

អតីតតារាម៉ូដែលអាមេរិក Loni Willison ដែលជាអតីតភរិយាតារាសម្ដែង Jeremy Jackson ថ្មីៗនេះបានធ្វើឱ្យមហាជនជាច្រើនមានការភ្ញាក់ផ្អើលជាខ្លាំង ពេលឃើញរូបនាងធ្លាក់ខ្លួនក្លាយជាជនអនាថា ក្រោយលែងលះស្វាមី និង ជាញឹកញាប់តែងឃើញដើររើកកាយរកចំណីអាហារ និង សម្លៀកបំពាក់តាមធុងសំរាមនានា។

តាមសារព័ត៌មាន Daily Mail បានចេញផ្សាយថា អតីតម៉ូដែលស្រី Loni Willison អាយុ ៤២ ឆ្នាំ បានបង្ហាញខ្លួនដើរតោកយ៉ាកតាមផ្លូវនៅ Beverly Hill សហរដ្ឋអាមេរិក កាលពីចុងសប្ដាហ៍មុន។ នាងស្ថិតក្នុងសម្លៀកបំពាក់ចាស់ៗ តែអ្វីដែលទាក់ភ្នែកមហាជននោះគឺនាឡិកា Rolex លើដៃរបស់នាង។ នាឡិកាដែលនាងពាក់នេះមិនដឹងប្រភពមកពីណាឡើយ ប៉ុន្តែមហាជនខ្លះគិតថាវាជារបស់ក្លែងក្លាយនោះទេ។ គួរឱ្យដឹងថា នាង Loni Willison ធ្លាប់ជាតារាម៉ូដែលល្បី និង ជោគជ័យមួយរូប ប៉ុន្តែជីវិតរបស់នាងបានដាំក្បាលចុះក្នុងឆ្នាំ ២០១៨ ក្រោយធ្លាក់ខ្លួនក្ស័យធន។

Loni Willison បានកើតក្នុងឆ្នាំ ១៩៨៣ នៅ California ដោយរូបនាងបានក្លាយជាតារាម៉ូដែលដ៏លេចធ្លោមួយរូបអំឡុងឆ្នាំ ២០០០។ រូបនាងបានបង្ហាញខ្លួនលើក្របសៀវភៅ fitness ល្បីៗមួយចំនួនដូចជា Glam Fit, Iron Man និង Flavor ដោយសារតែរូបរាងដ៏ទាក់ទាញ មាំទាំរបស់នាង។ ក្នុងឆ្នាំ ២០១២ Loni Willison ក៏បានរៀបការជាមួយតារាសម្ដែងប្រុស Jeremy Jackson ប៉ុន្តែចំណងអាពាហ៍ពិពាហ៍របស់ពួកគេគឺមិនមានក្ដីសុខដូចគូគេដទៃឡើយ ដោយពួកគេតែងតែឈ្លោះទាស់ទែងគ្នាជុំវិញតែរឿងគ្រឿងស្រវឹង។

នៅខែសីហា ឆ្នាំ ២០១៤ ប៉ូលិសបានចុះទៅដល់ផ្ទះរបស់ពួកគេ ក្រោយលោក Jackson ត្រូវគេចោទថាបានប្រើប្រាស់ហិង្សាលើប្រពន្ធ។ នៅពេលនោះ ប៉ូលិសក្រុង Los Angeles បានបញ្ជាក់ថា Loni បានរកឃើញមានរបួសនៅត្រង់ក បាក់ឆ្អឹងជំនីរចំនួន ២ និង មានស្នាមខ្វាចជាច្រើនលើមុខ និង ដងខ្លួន។ បើតាមការចេញផ្សាយរបស់ Ok Magazine នាង Loni Willison គឺមិនបានដាក់ពាក្យប្ដឹងអតីតប្ដីរបស់នាងឡើយ ប៉ុន្តែជម្លោះមួយនេះបានធ្វើឱ្យពួកគេឈានដល់ការលែងលះគ្នានៅក្នុងឆ្នាំដដែលនោះ។

ក្រោយលែងលះគ្នា ជីវិតការងាររបស់ Willison បានដាំក្បាលធ្លាក់ដល់បាត។ នាងបាត់បង់ការងារជាជំនួយការពេទ្យវះកាត់កែសម្ផស្សដោយសារតែបញ្ហាធ្លាក់ទឹកចិត្ត ហើយនាងក៏លែងអាចផ្ចង់មើលថែទាំរាងកាយឱ្យស្អាតមាំទាំដូចមុន។ របរក៏លែងមាន រូបកាយក៏លែងស្អាត Willison ក៏ធ្លាក់ផុងចូលបំណុលរហូតអស់ឡានអស់ផ្ទះនៅ។

កាលពីឆ្នាំ ២០១៨ សារព័ត៌មាន Daily Mail បានចេញផ្សាយរូបភាពអនាថាតាមផ្លូវដំបូងរបស់ Loni Willison។ ក្នុងជីវិតជាជនអនាថានោះ Willison ត្រូវបានឱ្យដឹងថាបានធ្លាក់ខ្លួនញៀនម៉ាទឹកកករហូតធ្វើឱ្យប៉ះពាល់សតិអារម្មណ៍នាងជាខ្លាំង។ សម្រាប់ Loni Willison ជីវិតតាមដងផ្លូវរាល់ថ្ងៃរបស់នាង គឺដូចជាការប្រឹងមួយរស់ៗ ហើយនាងសម្រេចចិត្តមិនងូតរាប់ឆ្នាំធ្វើឱ្យខ្លួនឯងគគ្រិចព្រោះដើម្បីការពារខ្លួនពីចោរលួច។ នាងថា មានគេលួចរបស់របរនាងជាញឹកញាប់ ដូច្នេះហើយនាងព្យាយាមធ្វើឱ្យខ្លួនឯងគគ្រិចដើម្បីកុំឱ្យក្លាយជាគោលដៅរបស់ចោរទៀត៕