បុរសជនជាតិចិនម្នាក់ ត្រូវបានកាត់ទោសឱ្យជាប់ពន្ធនាគារ ក្រោយលោកបានទៅបង្អើលសត្វមាន់ចំនួន ១១០០ ក្បាលរហូតងាប់ ដោយសារតែការកើតខឹងទាស់ទែងជាមួយអ្នកជិតខាង។
តាមសារព័ត៌មាន China Daily បានឱ្យដឹងថា បុរសរូបនោះមានត្រកូល Gu បានលួចចូលក្នុងកសិដ្ឋានចិញ្ចឹមមាន់របស់អ្នកជិតខាងរបស់លោក រួចយកពិលបើកភ្លើងបង្អើលមាន់ទាំងនោះឱ្យភ័យរត់បុកទ្រុងរហូតងាប់ព្រោងព្រាត។ តាមឱ្យដឹង លោក Gu និង អ្នកជិតខាង មានជម្លោះទាស់ទែងគ្នាដំបូងក្នុងខែមេសា ឆ្នាំ ២០២២ នៅពេលដែលលោកកាប់ដើមឈើរបស់អ្នកជិតខាងរូបនោះទាំងគ្មានការសុំអនុញ្ញាត ហើយប្រពន្ធរបស់បុរសជាអ្នកជិតខាងក៏បានយកដើមឈើនោះទៅបោះចោល ទើបបណ្ដាលឱ្យលោក Gu កើតការខឹងសម្បា។
ក្រោយមកនៅយប់មួយ លោក Gu ក៏បានលួចចូលកសិដ្ឋានចិញ្ចឹមមាន់របស់អ្នកជិតខាង រួចក៏យកពិលបើកបញ្ចាំងទៅបង្អើលមាន់រហូតពួកវារត់ប្រសេចប្រសាចបុកនេះបុកនោះរហូតងាប់អស់ ៥០០ ក្បាល។ សកម្មភាពរបស់លោក Gu ពេលនោះដែរ ត្រូវបានប៉ូលិសពិន័យជាសាច់ប្រាក់ចំនួន ៣ ០០០ យ័ន (ប្រមាណ ៤១១ ដុល្លារ) ទៅកាន់អ្នកជិតខាងលោក ប៉ុន្តែការពិន័យនេះមិនបានធ្វើឱ្យលោករាងចាលនោះឡើយ។ លោក Gu បានត្រឡប់លួចចូលកសិដ្ឋាននោះជាលើកទី ២ ហើយធ្វើការបង្អើលមាន់ដដែល ធ្វើឱ្យមាន់ចំនួន ៦៤០ ក្បាលទៀតបានងាប់។
ទង្វើរបស់លោក Gu ធ្វើផ្គើនលើកនេះបានធ្វើឱ្យតុលាការក្នុងតំបន់ Hengyang ខេត្ត Hunan ប្រទេសចិន បានចេញការចោទប្រកាន់លោក ពីបទបង្កឱ្យខូចខាតទ្រព្យសម្បត្តិអ្នកដទៃដោយចេតនា និង សម្រេចកាត់ទោសលោកឱ្យជាប់គុកចំនួន ៦ ខែ និង ស្ថិតក្រោមការតាមដានរយៈពេល ១ ឆ្នាំ៕
