គិតចាប់តាំងពីថ្ងៃទី ២១ ខែមិថុនា ឆ្នាំ ២០២៥ រហូតមកទល់ពេលនេះ នៅតាមសមុទ្រជុំវិញកោះ Tokara ខេត្ត Kagoshima ប្រទេសជប៉ុន គឺកើតមានគ្រោះរញ្ជួយដីជាប់ៗគ្នាច្រើនខ្លាំងមែនទែនរហូតដល់ទៅជាង ៤០០ ដង រហូតខាងទីភ្នាក់ងារឧតុនិយមប្រចាំប្រទេស ចេញការព្រមានឱ្យពលរដ្ឋរស់នៅតាមតំបន់នោះឱ្យមានការប្រុងប្រយ័ត្នចំពោះហានិភ័យនៃគ្រោះរញ្ជួយដីធ្ងន់ធ្ងរណាមួយកើតមានឡើង។
តាមការចេញផ្សាយពីទីភ្នាក់ងារសារព័ត៌មាន NHK ខាងភ្នាក់ងារឧតុនិយមប្រចាំប្រទេសជប៉ុនបានកត់ត្រាឃើញថាគ្រោះរញ្ជួយដីបានកើនឡើងនៅតាមតំបន់ជុំវិញកោះ Kodakarajima នាដែនកោះ Tokara តាំងពីថ្ងៃទី ២១ ខែមិថុនា មក។ គួរឱ្យកត់សម្គាល់នោះ ករណីគ្រោះរញ្ជួយដីបានបន្តកើតមានឡើងនៅក្នុងភូមិ Toshima កោះ Kodakarajima និង បណ្ដាកោះមួយចំនួនទៀត។
គួរបញ្ជាក់ថា គិតត្រឹមម៉ោង ៤ រសៀលថ្ងៃទី ២៥ ខែមិថុនា ឆ្នាំ ២០២៥ (ពេលវេលាក្នុងតំបន់) គ្រោះរញ្ជួយដីសរុបចំនួន ៤៣២ លើកក្នុងកម្រិតពី ១ រ៉ិចទ័រឡើងទៅ ត្រូវបានកត់ត្រាឃើញ។ ក្នុងចំណោមនោះ គ្រោះរញ្ជួយដី ៦ លើកមានកម្រិត ៤ រ៉ិចទ័រ ២១ លើកមានកម្រិត ៣ រ៉ិចទ័រ ១១៤ លើកមានកម្រិត ២ រ៉ិចទ័រ និង ២៩១ លើកក្នុងកម្រិត ១ រ៉ិចទ័រ។ ក្នុងនោះដែរ គ្រោះរញ្ជួយដីកម្រិត ១ ឬ ២ រ៉ិចទ័រក៏កត់ត្រាឃើញមាននៅតាមកោះជិតខាងមួយចំនួនផងដែរដូចជាកោះ Amami Oshima ជាដើម ប៉ុន្តែមិនមានការប្រកាសអាសន្នពីរលកយក្សស៊ូណាមិនោះឡើយ៕
