តាមតួលេខផ្លូវការ ប្រជាជនក្នុងប្រទេសជប៉ុនគឺបានធ្លាក់ចុះជាង ៩០ ម៉ឺននាក់មកត្រឹម ១២៤.៣ លាននាក់ក្នុងឆ្នាំ ២០២៤។ នេះជាការធ្លាក់ចុះដ៏អាក្រក់បំផុតមួយ គិតតាំងពីតួលេខស្ថិតិធ្វើឡើងក្នុងឆ្នាំ ១៩៦៨ មក ហើយនេះក៏ជាការធ្លាក់ចុះអត្រាកំណើតប្រជាជន ១៦ ឆ្នាំជាប់គ្នាដែរក្នុងប្រទេសជប៉ុន។
គួរឱ្យដឹងថា ៣០% នៃពលរដ្ឋសរុបក្នុងប្រទេសជប៉ុនឥលូវនេះជាមនុស្សវ័យចំណាស់អាយុពី ៦៥ ឆ្នាំឡើងទៅ ខណៈ ៦០% ទៀតជាមនុស្សវ័យចន្លោះពី ១៥ ទៅ ៦៤ ឆ្នាំ ហើយការធ្លាក់ចុះចំនួនប្រជាជនដ៏អាក្រក់នេះដែរ លោកនាយករដ្ឋមន្ត្រី Shigeru Ishiba ហៅស្ថានភាពនេះថាជា «ភាពអាសន្នដ៏ស្ងប់ស្ងាត់» និង ប្តេជ្ញារកវិធីសាស្ត្របន្ថែមដើម្បីបញ្ឈប់បញ្ហាដ៏ចាំបាច់សម្រាប់ប្រទេសមួយនេះ។
តាមទូរទស្សន៍ជាតិជប៉ុន NHK តូក្យូគឺជាទីក្រុងមួយរបស់ជប៉ុនដែលមានចំនួនពលរដ្ឋច្រើនជាងគេបំផុតចំនួន ១៤ លាននាក់។ ក្នុងចំណោមអ្នករស់នៅប្រទេសជប៉ុន ជនបរទេសក៏មានចំនួនគួរសមដែរ ជាក់ស្ដែងគិតត្រឹមថ្ងៃទី ០១ ខែមករា ឆ្នាំ ២០២៥ ជនបរទេសរស់នៅជប៉ុនមានចំនួន ៣.៦៧ លាននាក់។
គួរបញ្ជាក់ដែរថា ជនបរទេសគឺដើរតួយ៉ាងសំខាន់សម្រាប់សេដ្ឋកិច្ចនៅជប៉ុន ដោយជួយដោះស្រាយបញ្ហាកង្វះកម្លាំងពលកម្មក្នុងស្រុក ស្របពេលប្រទេសកើនឡើងតែមនុស្សចាស់ ហើយអត្រាកំណើតមិនមាន៕
