វីដេអូរបស់សត្វឆ្មាដ៏គួរឱ្យស្រឡាញ់មួយក្បាលនៅខាងក្រៅច្រកចូលព្រះវិហារ Xiyuan នាក្រុង Suzhou ប្រទេសចិន កំពុងតែផ្ទុះ viral ខ្លាំងលើបណ្ដាញសង្គមក្នុងប្រទេសចិន។ សត្វឆ្មានោះដែរមានពាក់ខ្សែកពណ៌មាស និង តែងតែស្វាគមន៍ភ្ញៀវដោយការលើកប្រអប់ដៃរបស់វាទៅ high-five ជាមួយដៃរបស់គេ។
អ្នកទេសចរម្នាក់ឈ្មោះ Zhang បានឱ្យដឹងថារូបគេបានទៅជួបសត្វឆ្មានោះ ៣ ថ្ងៃជាប់គ្នាហើយ។ Zhang បានរៀបរាប់ថា៖ «ពេលខ្លះ យើងត្រូវចាំកន្លះម៉ោងអីទើបអាចបាន high-five ជាមួយ ប៉ុន្តែខ្ញុំពិតជាពេញចិត្តខ្លាំងមែនទែនព្រោះវាបានធ្វើឱ្យផ្លូវអារម្មណ៍យើងល្អខ្លាំង»។
គួរឱ្យដឹងផងដែរថា បើតាមបុគ្គលិកនៅវិហារ Xiyuan បានបញ្ជាក់ដែរថា ឆ្មាមួយក្បាលនោះមិនមែនជាសត្វឆ្មាអនាថានោះឡើយ វាជាឆ្មាមានម្ចាស់ដែលគេនាំវាមកលេងទីនោះ។ ម្ចាស់របស់វាឈ្មោះ Liu ហើយឆ្មានោះមានឈ្មោះថា Jellybean អាយុ ៤ ឆ្នាំ។ Jellybean សកម្មណាស់ និង ចូលចិត្តដើរលេងក្រៅ ហើយ Liu ជាញឹកញាប់តែងតែនាំ Jellybean ទៅអាំងថ្ងៃនៅខាងក្រៅវិហារពេលចុងសប្ដាហ៍ ទើបធ្វើឱ្យវាល្បីមានមនុស្សមកចោមរោមបែបនេះ។ ថ្លែងប្រាប់សារព័ត៌មាន Dahe News លោក Liu បានរៀបរាប់ថា៖ «Jellybean មានបញ្ហារលាកត្រចៀក ហើយក្រោយពេលលាបថ្នាំរួចត្រចៀកវាសើម ដូច្នេះហើយត្រូវឱ្យវាអង្គុយត្រូវថ្ងៃដើម្បីឱ្យស្ងួត»។
នៅក្នុងព្រេងនិទានរបស់ជនជាតិចិន សត្វឆ្មាគឺចាត់ទុកជាសត្វដំណាងឱ្យសំណាងល្អ ហើយការលើកប្រអប់ដៃរបស់វាជាញឹកញាប់ត្រូវគេជឿថាជាសញ្ញានៃការទាក់ទាញលាភទ្រព្យ។ ងាកមកព្រះវិហារ Xiyuan វិញ ព្រះវិហារនេះគឺជាសំណង់សាសនាដ៏ល្បីល្បាញមួយមានទេសភាពសួនច្បារដ៏ស្រស់ស្អាត និង វិស្វកម្មបុរាណបែបព្រះពុទ្ធសាសនាដ៏អស្ចារ្យ។ ព្រះវិហារបុរាណនេះមានតាំងពីជំនាន់រជ្ជកាល Yuan មកម្ល៉េះ ហើយដោយសារតែទីនោះមានសត្វឆ្មាអនាថាច្រើន ភ្ញៀវដែលទៅទស្សនាតែងតែចាត់ទុកទីនោះជាឋានសួគ៌របស់អ្នកស្រឡាញ់ឆ្មា។ ចំពោះតម្លៃចូលទស្សនាវិញគឺត្រឹម ៥ យ័ន (០.៦៩ ដុល្លារ) ប៉ុណ្ណោះក្នុងម្នាក់៕
