ឆេះរីស៊តលើកំពូលភ្នំមួយនៅប្រទេសតួកគី ស្លា./ប់មនុស្ស ៦៦ នាក់យ៉ាងរន្ធ./ត់ ចំណែករីស៊តខូចខាតទាំងស្រុង

នៅវេលាម៉ោងប្រមាណ ៣ និង ២៧ នាទីទាបភ្លឺឈានចូលថ្ងៃទី ២១ ខែមករា ឆ្នាំ ២០២៥ (ពេលវេលាក្នុងតំបន់) មានអគ្គិភ័យដ៏សន្ធោសន្ធៅមួយបានឆាបឆេះឡើងនៅសណ្ឋាគាររីស៊ត Grand Kartal Otel ដែលមានទីតាំងនៅកន្លែងជិះស្គីទឹកកក Kartalkaya នៅភាគពាយព្យខេត្ត Bolu ប្រទេសតួកគី ដោយសោកនាដកម្មនេះបានបណ្ដាលឱ្យមនុស្សជាច្រើនស្លាប់ និង របួស។

តាមការបញ្ជាក់របស់លោក Ali Yerlikaya រដ្ឋមន្ត្រីក្រសួងមហាផ្ទៃបានឱ្យដឹងថា រហូតមកដល់ពេលនេះ ចំនួនអ្នកស្លាប់ក្នុងហេតុការណ៍អគ្គិភ័យខាងលើបានកើនឡើងដល់ ៦៦ នាក់ហើយ ខណៈអ្នករងរបួសមានចំនួន ៥១ នាក់។ តាមព័ត៌មានបានឱ្យដឹងថា អគ្គិភ័យបានចាប់ផ្ដើមឆាបឆេះចេញពីជាន់ទី ៤ នៃសណ្ឋាគារដែលមានកម្ពស់ ១១ ជាន់នោះ ហើយបើតាមរូបភាពស្ដែងៗបានបង្ហាញឱ្យឃើញផ្នែកខាងលើនៃសណ្ឋាគារគឺរងការឆាបឆេះអស់សឹងទាំងស្រុង។ អ្វីដែលកាន់តែរន្ធត់នោះគឺថា ភ្ញៀវទេសចរជាច្រើនបានព្យាយាមតោងចុះពីបន្ទប់គេចពីភ្លើងដោយប្រើប្រាស់ក្រណាត់ភួយ ខណៈមួយចំនួនទៀតដល់ថ្នាក់លោតចុះពីបង្អួចបន្ទប់ដើម្បីគេចពីភ្លើងផងដែរ។

គួរបញ្ជាក់ថា សណ្ឋាគាររីស៊តខាងលើមានទីតាំងនៅលើកំពូលភ្នំមួយដែលមានចម្ងាយប្រមាណ ១៧០ គីឡូម៉ែត្រភាគពាយព្យក្រុង Ankara ហើយអំឡុងពេលកើតហេតុនោះផងដែរ មានមនុស្សសរុបចំនួន ២៣៧ នាក់កំពុងស្នាក់នៅរីស៊តមួយនោះ។ ចំពោះមូលហេតុវិញគឺនៅមិនទាន់បានដឹងច្បាស់នៅឡើយទេ គ្រាន់តែលោកអភិបាល Abdulaziz Aydin លើកឡើងបឋមថាអគ្គិភ័យអាចនឹងកើតចេញឡើងពីភោជនីយដ្ឋានក្នុងសណ្ឋាគារ ហើយក៏ឆេះរាលដាលទៅពាសពេញអគារតែម្ដង៕