ករណីលួចម៉ូតូដ៏ហួសចិត្តមួយកំពុងផ្ទុះការចាប់អារម្មណ៍ខ្លាំងពីសំណាក់មហាជននៅប្រទេសឥណ្ឌូនេស៊ីនាពេលថ្មីៗនេះ ដោយចោរប្រុសម្នាក់ឈ្មោះ Martogi Sinaga អាយុ ២២ ឆ្នាំ បានសារភាពថាខ្លួនទៅចូលវិហារមួយកន្លែងដើម្បីដេកមួយស្របក់ក្រោយលួចម៉ូតូគេជិះរត់គេចខ្លួន ប៉ុន្តែក្រោយភ្ញាក់ដឹងខ្លួនឡើង រូបគេក៏ចាប់អារម្មណ៍ថាម៉ូតូដែលទើបលួចគេនោះត្រូវបានចោរម្នាក់ផ្សេងទៀតលួចយកទៅបាត់ទៅឡើយ។
តាមរបាយការណ៍ព័ត៌មានពី Kompas ចោរប្រុស Martogi បានលួចម៉ូតូម៉ាក Kawasaki KLX 150cc មួយគ្រឿងនៅតំបន់ Indragiri ខេត្ត Riau ប្រទេសឥណ្ឌូនេស៊ី កាលពីថ្ងៃទី ២៨ ខែមេសា ឆ្នាំ ២០២៤ កន្លងទៅ ខណៈម៉ូតូត្រូវគេចតចោលនៅមុខតូបលក់ចាប់ហួយ។ ម្ចាស់ម៉ូតូបានដាក់ពាក្យប្ដឹងទៅប៉ូលិស ហើយក្រោយការស៊ើបអង្កេត ប៉ូលិសក៏កំណត់បានជនសង្ស័យជាអ្នករស់នៅតំបន់ Serdang Bedagai នាខេត្ត North Sumatra ក្នុងរយៈចម្ងាយប្រមាណជាង ៦០០ គីឡូម៉ែត្រពីកន្លែងដែលចោរលួច។
ប៉ូលិសជឿជាក់ថា ជនសង្ស័យបានគេចខ្លួនទៅស្រុកកំណើតដោយជិះម៉ូតូដែលបានលួចទៅនោះ។ ប៉ូលិសក្នុងខេត្តទាំងពីរបានសហការគ្នា ហើយក៏ចាប់ខ្លួនជនសង្ស័យបានដោយជោគជ័យនៅផ្សាររាត្រីមួយកន្លែងក្នុងតំបន់ Serdang Bedagai ខេត្ត North Sumatra កាលពីថ្ងៃទី ០៧ ខែឧសភា ឆ្នាំ ២០២៥ កន្លងទៅនេះ។
យ៉ាងណាមិញ ជនសង្ស័យត្រូវចាប់ខ្លួនបាន ប៉ុន្តែម៉ូតូដែលជាទ្រព្យសម្បត្តិរបស់ជនរងគ្រោះគឺមិនមាននៅក្នុងដៃជនសង្ស័យជាចោរនោះឡើយ ព្រោះម៉ូតូនោះត្រូវបានចោរម្នាក់ផ្សេងទៀតលួចទៅខណៈដែលជនសង្ស័យដេកលក់នៅក្នុងវិហារ។ ទោះជាយ៉ាងណាក៏ដោយ Martogi នៅតែប្រឈមមុខចំពោះមុខច្បាប់ដដែលពាក់ព័ន្ធនឹងករណីចោរកម្ម ហើយដោយឡែកចំពោះម៉ូតូដែលត្រូវចោរផ្សេងទៀតលួចខាងប៉ូលិសនៅបន្តតាមដាននៅឡើយ៕
