ចិន ចេញយន្តការថ្មី ឈប់ឱ្យសិស្សតូចៗធ្វើកិច្ចការផ្ទះដល់យប់ជ្រៅ ទោះធ្វើមិនទាន់ចប់ក៏ដោយ

តំបន់ជាច្រើននៅក្នុងប្រទេសចិនបានដាក់ចេញយន្តការថ្មីមួយដោយអនុញ្ញាតឱ្យសិស្សានុសិស្សឈប់លែងបន្តធ្វើកិច្ចការផ្ទះរបស់ពួកគេតទៅទៀតបើទោះជាពួកគេមិនទាន់ធ្វើចប់ក៏ដោយ ដោយមានការស៊ីញ៉េយល់ព្រមដឹងឮពីសំណាក់ឪពុកម្ដាយ និង គ្រូៗ។

ជាក់ស្ដែងថ្មីៗនេះ នៅទីក្រុង Bengbu នាខេត្ត Anhui ភាគខាងកើតប្រទេសចិន បានការដាក់ចេញយន្តការមួយដែលអនុញ្ញាតឱ្យសិស្សថ្នាក់បឋមឈប់ធ្វើ homework នៅម៉ោង ៩ យប់ ខណៈសិស្សអនុវិទ្យាល័យឈប់ធ្វើនៅម៉ោង ៩ កន្លះយប់ បើទោះជាពួកគេធ្វើកិច្ចការទាំងនោះមិនទាន់ចប់ក៏ដោយ ឱ្យតែពួកគេទទួលបានការស៊ីញ៉េយល់ព្រមពីឪពុកម្ដាយ និង មានការដឹងឮពីគ្រូៗនៅសាលា។ គោលបំណងនៃយន្តការថ្មីនេះដែរ ដាក់ចេញឡើងក្នុងបំណងធានាថាកូនសិស្សទាំងអស់ទទួលបានការសម្រាកគ្រប់គ្រាន់ រួមទាំងជាការជំរុញឱ្យគ្រូៗទាំងអស់ធ្វើការដាក់កិច្ចការផ្ទះឱ្យសិស្សក្នុងចំនួនសមរម្យដែលអាចទទួលយកបាន។

ជាមួយគ្នានោះដែរ សាលាអនុវិទ្យាល័យនៅក្រុង Hefei ខេត្ត Anhui ក៏បានដាក់ចេញយន្តការថ្មីនេះផងដែរកាលពីថ្ងៃទី ១០ ខែមីនា ឆ្នាំ ២០២៥ កន្លងទៅ ដោយអនុញ្ញាតឱ្យឪពុកម្ដាយសិស្សស៊ីញ៉េលើកិច្ចការផ្ទះរបស់កូនដែលធ្វើមិនទាន់រួចរាល់ក្រោយម៉ោង ១០ យប់។ ក្នុងលិខិតប្រកាសមួយជូនដំណឹងដល់ឪពុកម្ដាយ ខាងសាលាបានអំពាវនាវឱ្យសិស្សទាំងអស់ព្យាយាមប្រឹងប្រែងបញ្ចប់កិច្ចការផ្ទះរបស់ពួកគេ ប៉ុន្តែប្រសិនបើកិច្ចការទាំងនោះច្រើនខ្លាំង ឬពិបាកក្នុងការដោះស្រាយទាន់ពេល នោះឪពុកម្ដាយអាចប្រើប្រាស់យន្តការថ្មីនេះបាន។

គួរឱ្យដឹងផងដែរថា នេះមិនមែនជាលើកដំបូងឡើយដែលបណ្ដាតំបន់ជាច្រើននៅប្រទេសចិនបានដាក់ចេញយន្តការបែបនេះ។ ជាក់ស្ដែង កាលពីដើមឆ្នាំ ២០២៣ កន្លងទៅ សាលាជាច្រើននៅក្រុង Suzhou ខេត្ត Jiangsu និង ក្រុង Ningbo ខេត្ត Zhejiang ប្រទេសចិន ក៏ដូចជាខេត្តផ្សេងៗទៀតដូចជា Shandong, Jiangxi និង Guangxi ជាដើម ក៏បានដាក់ចេញយន្តការស្រដៀងគ្នានេះដើម្បីជួយសម្រួលដល់ពេលវេលាសម្រាករបស់សិស្សផងដែរ៕