ថ្មីៗនេះ ប្រទេសចិនបានបង្ហាញមនុស្សយន្តថ្មីមួយហៅឈ្មោះថា «PM01» មានកម្ពស់ ១.៣៨ ម៉ែត្រ ទម្ងន់ ៤០ គីឡូ មានសមត្ថភាពបង្វិលចង្កេះរបស់វាបាន ៣០០ ដឺក្រេ អាចបញ្ចេញក្បាច់រាំតាមក្នុងរឿង «Kung Fu Hustle» ឬជាភាសាខ្មែរ «អ្នកលេងពូថៅហោះ» បានយ៉ាងរស់រវើកដូចមនុស្សពិតៗ កំពុងធ្វើឱ្យមហាជនជាច្រើនផ្ទុះការចាប់អារម្មណ៍ខ្លាំង។
កាលពីថ្ងៃទី ១៧ ខែមីនា ឆ្នាំ ២០២៥ កន្លងទៅ សារព័ត៌មាន Sina បានបង្ហាញវីដេអូមួយដែលណែនាំនូវមនុស្សយន្តថ្មីឈ្មោះ PM01 ដែលបង្កើតឡើងដោយ Zhongqing Robot Technology។ តាមរយៈវីដេអូនោះដែរ ទម្លាយឱ្យឃើញរ៉ូបូតនោះដៃកាន់ពូថៅ ក្បាលមានពាក់មួកតាមតួអង្គ gangster ក្នុងរឿងខាងលើ បញ្ចេញក្បាច់រាំយ៉ាងរស់រវើកជាមួយនឹងអ្នករាំ ២ នាក់ផ្សេងទៀតជាមនុស្ស។
ខាងក្រុមហ៊ុនបានលើកឡើងថា រ៉ូបូត PM01 ចាត់ទុកជាដំណើរឆ្ពោះទៅមុខដ៏សំខាន់មួយក្នុងការអភិវឌ្ឍន៍ភាពបត់បែនរបស់រ៉ូបូត។ តាមអ្នកតំណាងឱ្យក្រុមហ៊ុនបច្ចេកវិទ្យាខាងលើបានបញ្ជាក់ថា៖ «រ៉ូបូតគឺមិនត្រឹមតែជាម៉ាស៊ីននោះឡើយ ប៉ុន្តែជាលទ្ធផលនៃការរួមបញ្ចូលគ្នានៃវិទ្យាសាស្ត្រ បច្ចេកវិទ្យា និង សិល្បៈ»។
ក្រុមហ៊ុនបានបញ្ជាក់ទៀតថា វីដេអូខ្លីដែលថតបង្ហាញនេះគឺជាវីដេអូថតពិតៗមិនមែនការជួយពី AI នោះឡើយ។ វីដេអូនោះដែរ ទាក់ទាញDouyin ដោយមនុស្សជាច្រើនបានបញ្ចេញមតិថា ចលនារបស់ PM01 គឺមិនទាន់ដូចមនុស្សពិត ១០០% ឡើយ ប៉ុន្តែជារួមទៅវាគឺអាចបត់បែនបានល្អ ហើយក៏រាំក៏រលូនផងដែរ៕
