ជាមេរៀនមួយដែលគ្រប់គ្នាគួរប្រុងប្រយ័ត្ន ដោយស្ត្រីម្នាក់នៅប្រទេសឥណ្ឌូនេស៊ី ព្រោះតែចង់បានស្បែកសស្អាត ក៏ទៅធ្វើការចាក់ថ្នាំឱ្យស្បែកសនៅហាងថែរក្សាសម្រស់ដែលគ្មានអាជ្ញាប័ណ្ណមួយកន្លែង ទាំងមិនដឹងឡើយថាការចង់ឆាប់មានសម្បុរស្រស់ស្អាតនេះបានធ្វើឱ្យនាងត្រូវអស់អាយុជីវិតនោះ។
រឿងរ៉ាវរបស់នារីខាងលើត្រូវបានចែករំលែកដោយប្ដីរបស់នាងដែលជាអ្នកផលិតមាតិកាម្នាក់ឈ្មោះ Jay។ លោក Jay បានរៀបរាប់លើបណ្ដាញសង្គម TikTok របស់លោកថា ភរិយាលោកគឺមានសុខភាពល្អធម្មតាមុនទៅទទួលការចាក់ថ្នាំឱ្យស្បែកសកាលពីចុងសប្ដាហ៍កន្លងទៅ។ យ៉ាងណាមិញ ពេលត្រឡប់មកផ្ទះវិញ ប្រពន្ធលោកត្រូវកក់ហៅឡានតាម app ជិះ ក៏ព្រោះតែនាងមិនមានកម្លាំងបើកឡានខ្លួនឯងកើត។
អាការនាងកាន់តែអាក្រក់ទៅៗត្រឹមពេល ៤៨ ម៉ោងក្រោយការចាក់ថ្នាំនោះ។ លោក Jay មិនបានលម្អិតឡើយពីអាការប្រពន្ធលោក គ្រាន់តែលោកប្រាប់ថាវាពិតជាគួរឱ្យខ្លាចណាស់។ មកដល់ថ្ងៃទី ២៤ ខែកុម្ភៈ ឆ្នាំ ២០២៥ ប្រពន្ធលោកក៏បានបាត់បង់ជីវិតទៅ។ ខាងក្រុមគ្រួសារ បានទៅដល់ខាងហាងដើម្បីឱ្យពួកគេទទួលខុសត្រូវលើរឿងនេះ ប៉ុន្តែខាងហាងបានបដិសេធមិនទទួលខុសត្រូវនោះឡើយ។
ជុំវិញករណីនេះដែរ ខាងប៉ូលិសគឺមិនបានទទួលរបាយការណ៍ប្ដឹងផ្ដល់អ្វីឡើយ ប៉ុន្តែដោយសារតែវីដេអូដែល Jay បង្ហោះផ្ទុះការចាប់អារម្មណ៍ និង ចែកចាយខ្លាំងពេក ទើបធ្វើឱ្យខាងប៉ូលិសចាប់អារម្មណ៍ និង បើកការស៊ើបអង្កេតលើករណីនេះផងដែរ។
តែជាអកុសល ដោយសារតែសាកសពជនរងគ្រោះត្រូវបានយកទៅបញ្ចុះរួចរាល់ហើយនោះ ប៉ូលិសគឺមិនអាចស៊ើបរកមូលហេតុនៃការស្លាប់បានឡើយ លុះត្រាតែក្រុមគ្រួសារអនុញ្ញាតឱ្យគាស់សពឡើងមកវិញ៕
