កាលពីថ្ងៃទី ០៧ ខែមិថុនា ឆ្នាំ ២០២៥ កន្លងទៅ លោកប្រធានាធិបតីអាមេរិក ដូណាល់ ត្រាំ បានផ្ដល់បទសម្ភាសមួយជាមួយសារព័ត៌មាន NBC News ដោយរូបលោកបានប្រកាសថា ទំនាក់ទំនងរវាងលោក និង មហាសេដ្ឋី Elon Musk គឺបានបញ្ចប់ហើយ។
តាមការថ្លែងក្នុងកិច្ចសម្ភាស លោក ត្រាំ បាននិយាយថា៖ «ខ្ញុំគិតថាទំនាក់ទំនងរវាងខ្ញុំ និង Elon គឺបានបញ្ចប់ហើយ» ហើយនៅពេលដែលគេសួរថា លោកនៅទាក់ទងនិយាយគ្នាជាមួយ Elon Musk ទៀតទេ លោកប្រធានាធិបតីអាមេរិករូបនេះក៏បានតបវិញថា៖ «ខ្ញុំដូចគ្មានបំណងអ្វីចង់និយាយជាមួយគេទៀតនោះទេ»។
ទោះទំនាក់ទំនងរាប់អានគ្នាត្រូវបានបញ្ចប់ ប៉ុន្តែលោក ដូណាល់ ត្រាំ បានបញ្ជាក់ដែរថា លោកគឺមិនបានគិតអំពីការបញ្ចប់កុងត្រារដ្ឋាភិបាលជាមួយក្រុមហ៊ុនរបស់ Elon Musk នោះទេ រួមមានក្រុមហ៊ុន StarLink និង SpaceX។ បន្ថែមពីនេះ លោក ត្រាំ ក៏បានធ្វើការព្រមានដល់មហាសេដ្ឋី Elon Musk ដែរថា Elon អាចប្រឈមនឹងបញ្ហាធ្ងន់ធ្ងរ ប្រសិនបើលោកផ្ដល់មូលនិធិដល់បេក្ខភាពគណបក្សប្រជាធិបតេយ្យប្រជែងនឹងសមាជិកសភាសាធារណរដ្ឋដែលបោះឆ្នោតគាំទ្រច្បាប់ពន្ធ និង ការចំណាយរបស់រដ្ឋាភិបាល។
គួរឱ្យដឹងថា ថ្មីៗកន្លងទៅនេះ ទំនាក់ទំនងជិតស្និទ្ធរវាងលោក ដូណាល់ ត្រាំ និង ស្ថាបនិកក្រុមហ៊ុន Tesla លោក Elon Musk គឺបានប្រែក្លាយជាគូជំទាស់ជាមួយគ្នា ក្រោយអ្នកទាំងពីរមានការទាស់សម្ដីគ្នាខ្លាំងលើបណ្ដាញសង្គម៕
