ហាងសាឡនមួយចំនួននៅក្រុង Guangzhou ប្រទេសចិន បានងាកមកប្រើប្រាស់ម៉ាស៊ីនកក់សក់ដោយប្រើបច្ចេកវិទ្យា AI កំពុងតែទាក់ទាញចំណាប់អារម្មណ៍អតិថិជនជាច្រើន។
ម៉ាស៊ីនកក់សក់ដោយប្រើ AI នេះដែរបានចាប់ផ្ដើមមានវត្តមានតាមហាងសាឡនក្នុងសង្កាត់ជាច្រើននៅក្រុង Guangzhou ប្រទេសចិន តាំងពីដើមឆ្នាំ ២០២៥ មកម៉្លេះ។ ម៉ាស៊ីនកក់សក់បែបទំនើបនេះគឺប្រើប្រាស់ sensors ស្កេនស្បែកក្បាលរបស់អតិថិជនដើម្បីវាអាចជ្រើសរើសសាប៊ូដែលត្រឹមត្រូវស័ក្ដិសមសម្រាប់ប្រភេទសក់របស់ភ្ញៀវនីមួយៗ។ បន្ថែមពីនេះ ម៉ាស៊ីនខាងលើក៏មានជម្រើសកក់សក់ជាច្រើនដូចជា ការកក់សក់រហ័ស ការកក់ធម្មតា និង ការកក់យូរ។ ក្នុងនោះដែរ វាក៏មានកម្រិតម៉ាស្សាស្បែកក្បាលចំនួន ៣ កម្រិត រួមនឹងជម្រើសដាច់ដោយឡែកសម្រាប់សក់វែង និង សក់ខ្លីទៀតផង។ ដំណើរការកក់សក់ទាំងអស់ចំណាយពេលចំនួន ១៣ នាទីរួមមានការកក់សាប៊ូចំនួន ២ លើក ដាក់ថ្នាំអប់សក់ចំនួន ១ និង ការសម្អាតទឹកចំនួន ៧ ដង។
ម៉ាស៊ីនកក់សក់អូតូមិនប្រើមនុស្សនេះដែរ កាលដាក់ចេញប្រើប្រាស់ដំបូង កក់ម្ដងតម្លៃត្រឹម ១០ យ័ន (ប្រមាណ ១.៣៧ ដុល្លារ) ប៉ុណ្ណោះ ប៉ុន្តែឥលូវនេះដោយសារមានតម្រូវការច្រើន តម្លៃកក់ម្ដងកើនដល់ ១៩ យ័ន (ប្រមាណ ២.៦១ ដុល្លារ)។ យ៉ាងណាមិញ ការកក់សក់ដោយប្រើប្រាស់បច្ចេកវិទ្យាទំនើបនេះ ទទួលបានការវែកញែកផ្សេងៗគ្នាពីអ្នកលេងបណ្ដាញសង្គមជាច្រើន។
ជាក់ស្ដែង អ្នកលេងតាមបណ្ដាញសង្គមខ្លះបានរិះគន់មិនពេញចិត្តលើសេវាកម្មថ្មីនេះដោយមានម្នាក់បញ្ចេញមតិថា៖ «ខ្ញុំព្យាយាមសាកល្បងវា ប៉ុន្តែវាដូចគ្មានបានផលអ្វីឡើយ ស្បែកក្បាលខ្ញុំឡើងឈឺ» ខណៈម្នាក់ទៀតបានរិះគន់ដែរថា៖ «រាល់ពេលដែលម៉ាស៊ីនដាក់សាប៊ូហើយកក់ វាអត់បានជ្រាបដល់ស្បែកក្បាលខ្ញុំឡើយ ដោយក្រោយវាលាងសម្អាតរួច ខ្ញុំត្រូវមកកក់ខ្លួនឯងម្ដងទៀតដដែល»។ ដោយឡែក ក៏នៅមានមនុស្សមួយចំនួនទៀតសម្ដែងការពេញចិត្តផងដែរដោយពួកគេចាប់អារម្មណ៍នឹងបទពិសោធថ្មីនេះជាខ្លាំង៕
ប្រភព៖ VN Express
