ចង់បានរាងសង្ហា ទៅសម្រុកហាត់ប្រាណទាំងមិនធ្លាប់ហាត់សោះ ៤ ថ្ងៃក្រោយឈឺចូលពេទ្យ ពិនិត្យឃើញខូចក្រលៀន

រឿងរ៉ាវរបស់បុរសវ័យ ២៧ ឆ្នាំម្នាក់នៅប្រទេសចិន ថ្មីៗនេះកំពុងធ្វើឱ្យមហាជនចាប់អារម្មណ៍ជាខ្លាំង ព្រោះតែរូបគេបានសាងកំហុសមួយអំឡុងពេលហាត់ប្រាណរហូតកើតមានជំងឺក្នុងខ្លួនដក់ថ្នាក់ប៉ះពាល់ដល់ក្រលៀនថែមទៀត។

បុរសខាងលើត្រូវបានស្គាល់ឈ្មោះថា Liu Han អាយុ ២៧ ឆ្នាំ ជាអ្នកខេត្ត Henan ប្រទេសចិន។ Liu ជាមនុស្សស្ងប់ស្ងាត់ ប៉ុន្តែថ្មីៗនេះគេស្រាប់តែចាប់អារម្មណ៍ចង់ហាត់ប្រាណដើម្បីយកសាច់ដុំ។

យ៉ាងណាមិញ ចាប់ផ្ដើមហាត់ប្រាណបានត្រឹម ២ ថ្ងៃ រាងកាយរបស់ Liu ស្រាប់តែកើតមានអាការចម្លែកដូចជានោមមកទឹកនោមឡើងក្រហមក្រម៉ៅ តែយ៉ាងណា លោកមិនបានចាប់អារម្មណ៍ឡើយ ហើយបន្តហាត់ប្រាណតាមធម្មតា។

ដោយឡែក មកដល់ថ្ងៃទី ៤ ទឹកនោមក្រហមក្រម៉ៅនៅតែបន្តមានដដែល ហើយថែមពីនេះលោក Liu ក៏ឈឺចុកចាប់សាច់ដុំខ្លាំងរហូតសឹងកម្រើកខ្លួនមិនបាន ទើបលោកដាច់ចិត្តទៅមន្ទីរពេទ្យទទួលការព្យាបាលបន្ទាន់។

នៅពេទ្យ Liu បានធ្វើតេស្តឈាមហើយរកឃើញថាកម្រិត creatine kinase (CK) គឺហក់ឡើងដល់ 440 000 ក្នុងមួយមីលីលីត្រ ដែលចំនួននេះគឺឡើងខ្ពស់ខ្លាំងជាងធម្មតា។ ក្រៅពីនេះ លោក Liu ក៏រកឃើញកើតមានបញ្ហាស្លាប់សាច់ដុំ (Rhabdomyolysis) និង ខូចក្រលៀនស្រួចស្រាវ ដែលតម្រូវឱ្យលោកត្រូវទទួលការព្យាបាលជាបន្ទាន់។

នៅពេលពិនិត្យមើលប្រវត្តិសុខភាព គ្រូពេទ្យបានរកឃើញថា Liu បានធ្វើលំហាត់ប្រាណខ្លាំងរយៈពេល ៤ ថ្ងៃជាប់គ្នា។ គ្រូពេទ្យបានបញ្ជាក់ដែរថា មនុស្សជាច្រើនដូចជា Liu គឺមានទម្លាប់ទៅធ្វើការហាត់ប្រាណខ្លាំងភ្លាមៗ ដើម្បីឆាប់ស្រកទម្ងន់ ឬ ឡើងសាច់ដុំ តែពួកគេមិនដឹងឡើយថា ការធ្វើលំហាត់ប្រាណបែបនេះគឺអាចបង្កឱ្យស្លាប់សាច់ដុំ និង ឈានដល់ការខូចក្រលៀនបាន៕