បុរសម្នាក់ត្រូវគេស្គាល់ឈ្មោះថា Xiaolin ត្រូវបងប្អូនប្រុសដាក់ពាក្យបណ្ដឹងតាមរក ក្រោយបាត់ដំណឹងពីលោករយៈពេល ៣ ថ្ងៃ។
តាមសារព័ត៌មានចិន SCMP បានឱ្យដឹងថា ប៉ូលិសនៅសង្កាត់ Yuhang ប្រទេសចិន បានចុះទៅផ្ទះ Xiaolin ហើយក៏រកឃើញថាផ្ទះមិនមានមនុស្សឡើយហើយទូរស័ព្ទក៏លោកទុកចោលនៅផ្ទះមិនយកតាមខ្លួនដែរ។ តាមការឆែកកាមេរ៉ាសុវត្ថិភាព បានបង្ហាញឱ្យឃើញលោក Xiaolin ចុងក្រោយបង្អស់នៅក្បែរតំបន់ភ្នំ Dalang កាលពីថ្ងៃទី ២១ ខែមិថុនា ឆ្នាំ ២០២៥ កន្លងទៅ ជាហេតុធ្វើឱ្យមានការបើកប្រតិបត្តិការរុករកទ្រង់ទ្រាយធំដោយបញ្ជូនប៉ូលិសជាង ១០០ នាក់ សុនខប៉ូលិស និង ការប្រើប្រាស់ដ្រូនជំនួយ។
យ៉ាងណាមិញ ក្រោយការរុករកអស់រយៈពេល ៦ ថ្ងៃ ទីបំផុត Xiaolin ក៏ត្រូវគេប្រទះឃើញតាមកាមេរ៉ារ៉ាសុវត្ថិភាពនៅសួនច្បារមួយកន្លែងជិត ៤០ គីឡូម៉ែត្រពីកន្លែងដែលលោកចាកចេញដំបូង។ តាមការបញ្ជាក់ពីលោកប្រធានរងប៉ុស្តិ៍ប៉ូលិសសង្កាត់ Yuhang បាននិយាយថា លោក Xiaolin បានដើរឡើងភ្នំលេងដើម្បីឱ្យកាត់ចិត្តពីអតីតមិត្តស្រីដែលទើបបែកគ្នាថ្មីៗ។ ពេលប៉ូលិសរកឃើញគាត់ ខោអាវគាត់រហែករយះអស់ហើយ។
តាមការរៀបរាប់របស់ Xiaolin ប្រាប់ប៉ូលិស លោកថា ៣ ថ្ងៃដំបូង លោកមិនមានអីផឹកឬញ៉ាំទេ តែក្រោយមក លោកក៏ឃើញផ្លៃឈើព្រៃ ហើយទឹកតាមដងជ្រោះលើភ្នំ ទើបអាចបន្តជីវិតបានទល់ពេលនេះ៕
