រឿងរ៉ាវដ៏គួរឱ្យរន្ធត់ និង អាណិតអាសូរមួយបានកើតមានឡើងក្នុងក្រុង Shaoguan ខេត្ត Guangdong ប្រទេសចិន ដោយមានក្មេងប្រុសម្នាក់ត្រូវបាត់បង់ជីវិតទាំងវ័យក្មេងព្រោះតែត្រូវសត្វអណ្ដើកមួយក្បាលធ្លាក់ពីលើអគារក្បែរនោះចំក្បាលមួយទំហឹង។ ករណីនេះដែរ ត្រូវបានចេញផ្សាយដោយកាសែតម៉ាឡេស៊ីមួយឈ្មោះ Sin Chew Daily ដោយបានរៀបរាប់ថា ម្ចាស់សត្វអណ្ដើកមួយក្បាលដែលធ្លាក់មកនោះគឺត្រូវសងសំណងជនរងគ្រោះក្នុងចំនួនទាំងប្រាក់យ៉ាងច្រើនរហូតដល់ ១.២៨ លានយ័ន (ប្រមាណ ១៧៧ ៩៤៣ ដុល្លារ)។
បើតាមរបាយការណ៍លម្អិតដែលបានបញ្ចេញដោយខាងតុលាការប្រជាជនកំពូលនៅ Shaoguan កាលពីថ្ងៃទី ១០ ខែមិថុនា ឆ្នាំ ២០២៥ កន្លងទៅ បានឱ្យដឹងថា ហេតុការណ៍ខាងលើបានកើតឡើងកាលពីចុងឆ្នាំកន្លងទៅ នៅពេលប្ដីប្រពន្ធមួយគូត្រកូល Zhao កំពុងលេងជាមួយកូនរបស់ពួកគេនៅទីធ្លាក្រោមនៃតំបន់អគារស្នាក់នៅមួយ។ ភ្លាមៗនោះ ស្រាប់តែមានសត្វអណ្ដើកមួយក្បាលធ្លាក់ពីលើមកចំក្បាលរបស់ក្មេងរងគ្រោះតែម្ដង។ រូបគេត្រូវបានបញ្ជូនទៅមន្ទីរពេទ្យសង្គ្រោះភ្លាមៗប៉ុន្តែជាអកុសលដោយសាររបួសធ្ងន់ធ្ងរពេក ក្មេងប្រុសរូបនោះក៏បានបាត់បង់ជីវិតទៅ។
ករណីមួយនេះត្រូវបានប៉ូលិសស៊ើបអង្កេត ដោយក្រោយមកក៏រកឃើញថាអ្នកស្នាក់នៅទីនោះម្នាក់ត្រកូល Zhang គឺជាម្ចាស់សត្វអណ្ដើកនោះ។ លោក Zhang គឺជាអ្នកគ្រប់គ្រងអចលនទ្រព្យ និង ក្រុមហ៊ុនធានារ៉ាប់រងមួយ ហើយដំបូងឡើយ ក្រុមគ្រួសាររបស់ជនរងគ្រោះបានព្យាយាមសម្រួលគ្នាលើសំណងផងដែរ ប៉ុន្តែការចរចារវាងពួកគេមិនទទួលបានផល។
ពាក្យបណ្ដឹងបានរុញឡើងដល់តុលាការ ដោយក្រោយពិនិត្យមើលលើករណីនេះ ខាងតុលាការបានលើកសម្រេចថា៖ «ប្រសិនបើសត្វចិញ្ចឹមបង្កការប៉ះពាល់ដល់អ្នកដទៃក្នុងស្ថានទម្រង់ណាក៏ដោយ អ្នកចិញ្ចឹមត្រូវទទួលខុសត្រូវចំពោះការខូចខាតដែលបានកើតឡើង។ យ៉ាងណាមិញ ប្រសិនបើរកឃើញថា ផលប៉ះពាល់ដែលបានកើតឡើងគឺដោយសារតែជនរងគ្រោះត្រូវឪពុកម្ដាយធ្វេសប្រហែស ឬបណ្ដោយមិនប្រយ័ត្ន នោះការទទួលខុសត្រូវរបស់ភាគីបង្កអាចកាត់បន្ថយ ឬលើកលែងទោស»។
យ៉ាងណាមិញ តាមភស្តុតាងដែលទទួលបាន គឺភាគីខាងជនរងគ្រោះគឺមិនបានបណ្ដោយ ឬធ្វេសប្រហែសចំពោះកូនរបស់ខ្លួនឡើយ ដូច្នេះខាងភាគីជាម្ចាស់សត្វចិញ្ចឹមគឺត្រូវទទួលខុសត្រូវទាំងស្រុងលើសំណងទៅជនរងគ្រោះ៕
ប្រភព៖ Kenh14
