កាលពីព្រឹកថ្ងៃទី ០៣ ខែកុម្ភៈ ឆ្នាំ ២០២៥ កន្លងទៅ ក្រុមគ្រួសាររបស់តារាសម្ដែងស្រី Barbie Hsu រួមទាំងក្រុមហ៊ុនរបស់នាងបានចេញមកប្រកាសឱ្យមហាជនក៏ដូចជាអ្នកគាំទ្ររបស់នាងដឹងថា Barbie បានទទួលមរណភាពទៅហើយនៅប្រទេសជប៉ុនក្នុងវ័យ ៤៨ ឆ្នាំ ហើយចំពោះមូលហេតុនោះគឺបណ្ដាលមកពីការឆ្លងរោគផ្ដាសាយឈានដល់ការរលាកសួតធ្ងន់ធ្ងរ។ យ៉ាងណាមិញ បើតាមវិបសាយ 163 លោក Koo Jun Yup ដែលត្រូវជាស្វាមីរបស់ Barbie គឺមិនបានធ្វើដំណើរកម្សាន្តទៅជប៉ុនជាមួយភរិយា និង ក្រុមគ្រួសារនោះឡើយ ហើយនៅពេលដែលប្រកាសថា ភរិយាលោកបានលាចាកលោកទៅនោះ លោក Koo គឺនៅតៃវ៉ាន់នោះទេ ដែលជាហេតុធ្វើឱ្យលោកតក់ស្លុតមិនអាចទទួលយកបាន។
តាមការ update ព័ត៌មានចុងក្រោយពីសារព័ត៌មាន ETtoday លោក Koo Jun Yup គឺកំពុងបាត់ខ្លួនមិនអាចទាក់ទងបាននោះឡើយ។ ក្រុមគ្រួសារ និង មិត្តភក្តិព្យាយាមទាក់ទងទៅ តែលោកមិនព្រមលើកទូរស័ព្ទនោះឡើយ។ អ្វីដែលរឹតតែធ្វើឱ្យគ្រប់គ្នាព្រួយបារម្ភកាន់តែខ្លាំងបំផុតនោះ គឺគ្មាននរណាម្នាក់បានដឹងឡើយថាពេលនេះលោក Koo នៅទីណានោះ។ ជាក់ស្ដែង តាមការរៀបរាប់ទាំងក្ដីបារម្ភពីមិត្តភក្តិម្នាក់របស់ Barbie និង លោក Koo បានឱ្យដឹងថា៖ «គាត់នៅតៃវ៉ាន់ តែទាក់ទងទៅគាត់មិនបាននោះទេ។ ពួកយើងពិតជាមិនដឹងថាគាត់នៅទីណានោះឡើយ។ នៅតៃវ៉ាន់ គាត់មានតែ Barbie Hsu ប៉ុណ្ណោះជាសាច់ញាតិ។ ខ្ញុំបានទៅផ្ទះរបស់គាត់ដើម្បីរកគាត់ តែរកឃើញមិនឃើញឡើយ»។
គួររំឭកដែរថា កាលពីរសៀលថ្ងៃទី ០៣ ខែកុម្ភៈ ឆ្នាំ ២០២៥ កន្លងទៅ សារព័ត៌មានកូរ៉េ Ilgan Sports បានទូរស័ព្ទទៅសម្ភាសលោក Koo Jun Yup ក្រោយទទួលដំណឹងថា Barbie Hsu លាចាកលោកទៅ។ ចម្លើយដែលទទួលបានមកវិញគឺបង្ហាញឱ្យឃើញថាលោក Koo ស្ថិតក្នុងស្ថានភាពមិនល្អនោះឡើយដោយលោកឆ្លើយតបត្រឹមពាក្យ ៣ ម៉ាត់ប៉ុណ្ណោះគឺ «I’m not okay»។
តារាសម្ដែងស្រី Barbie Hsu និង លោក Koo Jun Yup បានចាប់ផ្ដើមទាក់ទងស្នេហាគ្នាដំបូងក្នុងឆ្នាំ ១៩៩៨ ប៉ុន្តែមួយឆ្នាំក្រោយមក ពួកគេក៏បានចែកផ្លូវគ្នាដោយសារតែភាពមមាញឹកនឹងការងារ។ រហូតមកដល់ឆ្នាំ ២០២១ ក្រោយឮដំណឹងថា Barbie បានលែងលះគ្នាជាមួយស្វាមីជាអ្នកជំនួញលោក Wang Xiaofei លោក Koo ក៏បានរកឃើញលេខទូរស័ព្ទចាស់របស់អតីតសង្សារ ហើយក៏ទាក់ទងទៅលួងលោមនាង។ ក្រោយឆាតអនឡាញចុះឡើងៗរយៈពេលប៉ុន្មានខែ ស្នេហ៍ចាស់ក៏រើឡើងវិញហើយពួកគេក៏សម្រេចចិត្តបង្កាត់ភ្លើងស្នេហ៍ជាថ្មី។
នៅថ្ងៃទី ០៨ ខែកុម្ភៈ ឆ្នាំ ២០២២ Barbie Hsu និង Koo Jun Yup បានចុះអេតាស៊ីវិលជាមួយគ្នាស្ងាត់ៗក្នុងប្រទេសកូរ៉េ ហើយមកដល់ថ្ងៃទី ០៨ ខែមីនា ឆ្នាំ ២០២២ ដដែល គូស្នេហ៍តារាមួយគូនេះក៏បានចេញមកប្រកាសថាពួកគេនឹងចាប់ដៃគ្នារៀបការម្ដងទៀតនៅតៃវ៉ាន់ ដោយការចុះសំបុត្រអាពាហ៍ពិពាហ៍ទី ២ នេះពួកគេធ្វើឡើងនៅថ្ងៃទី ២៨ ខែមីនា ឆ្នាំ ២០២២។ ក្នុងខែមិថុនា ឆ្នាំ ២០២២ Barbie Hsu និង DJ Koo បានរៀបចំពិធីរៀបការតូចមួយនៅផ្ទះ ដោយក្រោយមក DJ Koo ក៏បានផ្លាស់មកនៅតៃវ៉ាន់ដើម្បីរួមរស់ជាមួយប្រពន្ធ និង កូនៗទាំង ២ នាក់របស់នាង៕
ប្រភព៖ Kenh14
