គ្រូបង្រៀនប្រុសវ័យខ្ទង់ជាង ២០ ឆ្នាំម្នាក់នៅភាគកណ្ដាលប្រទេសចិន បានជួបអកុសលត្រូវគាំងបេះដូងស្លាប់ទាំងវ័យក្មេងក្នុងកន្លែងការងាររបស់ខ្លួន ទំនងដោយសារតែតានតឹងស្ត្រេសខ្លាំងពេកពីការគ្រប់គ្រងបង្រៀនសិស្សដល់ទៅ ៤០០ នាក់ម្នាក់ឯង បូករួមនឹងការថែមម៉ោងធ្វើការយូរពេក។
បុរសជាគ្រូខាងលើត្រូវបានគេស្គាល់ត្រឹមត្រកូល Li បានធ្វើការរយៈពេល ៥ ឆ្នាំហើយឱ្យក្រុមហ៊ុនបណ្ដុះបណ្ដាលការសិក្សាមួយនៅក្រុង Wuhan ប្រទេសចិន ដែលក្រុមហ៊ុននេះបានបើកដំណើរការវគ្គអនឡាញមួយដែលបង្រៀនភាសាអង់គ្លេស និង គណិតវិទ្យាដល់សិស្សថ្នាក់បឋម និង អនុវិទ្យាល័យ។
តាមសារព័ត៌មានក្នុងប្រទេសចិនបានឱ្យដឹងថា លោក Li បានប្រឹងធ្វើការលើសម៉ោងរយៈពេលប៉ុន្មានថ្ងៃជាប់គ្នាដើម្បីបញ្ចប់ការងារឱ្យរួចរាល់មុនថ្ងៃសម្រាកមកដល់។ ស្រាប់តែដល់ថ្ងៃទី ២២ ខែមេសា ឆ្នាំ ២០២៥ កន្លងទៅ លោកបានទៅអូហ្វិសហើយធ្វើការយឺតម៉ោងរហូតដល់យប់។ គូដណ្ដឹងរបស់លោកព្យាយាមទាក់ទងទៅតែទាក់ទងមិនបាន ទើបមានការបារម្ភក៏ទាក់ទងទៅរកប៉ូលិសឱ្យជួយ។
ដល់ព្រឹកថ្ងៃបន្ទាប់ រឿងតក់ស្លុតក៏បានកើតឡើងក្រោយអ្នកអនាម័យម្នាក់បានប្រទះឃើញលោក Li លែងដឹងខ្លួនទៅហើយនៅក្នុងអូហ្វិស ដោយក្រោយមកលោកត្រូវបានប្រកាសថាបានផុតដង្ហើមទៅហើយដោយសារតែបញ្ហាគាំងបេះដូង។ អ្វីដែលរឹតតែគួរឱ្យខ្លោចចិត្តជាងនេះទៅទៀតនោះគឺ លោក Li មានគម្រោងរៀបការជាមួយគូដណ្ដឹងនៅថ្ងៃទី ០២ ខែឧសភា ឆ្នាំ ២០២៥ តែបែរជាមកត្រូវចាកចេញគ្មានថ្ងៃត្រឡប់បែបនេះទៅវិញ។
អាជ្ញាធរខាងពលកម្មក្នុងតំបន់បានបញ្ជាក់ថា ក្រុមគ្រួសាររបស់លោក Li ជាមួយនឹងក្រុមហ៊ុនដែលលោកធ្វើការ គឺកំពុងតែដំណើរការបញ្ចប់ឯកសារដើម្បីទទួលស្គាល់ជាផ្លូវការថាការស្លាប់របស់លោកគឺពាក់ព័ន្ធនឹងការងារ។ យ៉ាងណាមិញ នៅថ្ងៃទី ២៥ ខែមេសា ឆ្នាំ ២០២៥ ខាងក្រុមហ៊ុនបានចេញលិខិតសម្ដែងការរំលែកទុក្ខ និង សន្យាជួយដល់ក្រុមគ្រួសាររបស់លោក Li ប៉ុន្តែក្នុងលិខិតនោះដែរក៏បានបញ្ជាក់ដែរថា ខាងក្រុមហ៊ុនមិនមានកាលវិភាគថែមម៉ោងសម្រាប់ក្រុមលោក Li នោះឡើយ ហើយខាងក្រុមហ៊ុនក៏បាននិយាយពី performance ការងាររបស់លោក រួមទាំងស្នើសុំដល់សាធារណជនឱ្យគោរពដល់ឯកជនភាពរបស់ក្រុមគ្រួសារលោក Li ផង ក្នុងពេលវេលាដ៏លំបាកមួយនេះ៕
ប្រភព៖ World Of Buzz
