ហេតុការណ៍ដ៏ហួសចិត្តមួយបានកើតមានឡើងលើយន្តហោះ JetBlue ដោយបុរសជាអ្នកដំណើរវ័យ ២៣ ឆ្នាំម្នាក់បានខឹងទាស់ទែងជាមួយមិត្តស្រី ក៏ងើបស្ទុះទៅច្រកទ្វារអាសន្នរួចបើកទ្វារបង្កជាការរាំងស្ទះដល់អ្នកដំណើរដទៃមួយត្រូវខកជើងហោះហើរអស់រាប់ម៉ោង។
តាមការបញ្ជាក់ពីអ្នកដំណើរម្នាក់ទៅកាន់សារព័ត៌មាន NBC News បានឱ្យដឹងថា ជម្លោះទាស់ទែងពាក្យសម្ដីបានកើតឡើងនៅពេលបុរសវ័យក្មេងរូបនោះសុំឆែកមើលទូរស័ព្ទរបស់មិត្តស្រីតែត្រូវនាងបដិសេធ។ ក្រោយមកភ្លាមៗ រូបគេក៏បានងើបស្ទុះទៅច្រកទ្វារអាសន្នរួចធ្វើការបើកទ្វារយកតែម្ដង។ តាមការរៀបរាប់របស់សាក្សីបាននិយាយថា៖ «ប្រុសម្នាក់នោះមានការខឹងសម្បាខ្លាំង។ ខ្ញុំគិតថាមិត្តស្រីគាត់កំពុងមើលទូរស័ព្ទ ហើយរូបគាត់ក៏ចង់ឆែកមើលថាមិត្តស្រីគាត់កំពុងតែមើលអី តែនាងមិនព្រមឱ្យទូរស័ព្ទទៅគាត់ទើបធ្វើឱ្យគាត់ផ្ទុះកំហឹងបែបនេះ»។
គួរឱ្យដឹងថា ច្រកទ្វារអាសន្នបានបើកភ្លាមៗទម្លាក់ slide អាសន្នចុះដល់ដី ហើយបុរសរូបនោះប្រុងនឹងលោតចុះពីយន្តហោះហើយតែជាសំណាងល្អ ខាងភ្នាក់ងារ FBI និង បុគ្គលិកលើយន្តហោះចាប់ក្របួចរូបគេទាន់។ ហេតុការណ៍ខាងលើនេះដែរ មិនបណ្ដាលឱ្យនរណាម្នាក់រងរបួសនោះឡើយ គ្រាន់តែអ្នកដំណើរដទៃផ្សេងទៀតត្រូវជាប់គាំងយឺតការធ្វើដំណើររយៈពេល ៣ ម៉ោង មុនផ្លាស់ទៅជិះយន្តហោះថ្មីបន្ត។
ដោយឡែកចំពោះបុរសជាអ្នកបង្កការរំខានត្រូវបានឃាត់ខ្លួន ប៉ុន្តែក្រុមគ្រួសារបានបង់ប្រាក់ ៥០០ ដុល្លារឱ្យនៅក្រៅឃុំ។ តាមការបញ្ជាក់ពីមេធាវីរបស់បុរសរូបនោះបានលើកឡើងថា ហេតុការណ៍កើតឡើងព្រោះតែកូនក្ដីខ្លួនមានបញ្ហាសតិអារម្មណ៍។ «រូបគាត់ខ្លួនឯងក៏ហួសចិត្តខ្លាំង និង មិនដឹងថារឿងហេតុកើតឡើងរបៀបមិចឡើយ។ កូនក្ដីខ្ញុំមានប្រវត្តិប្រើប្រាស់ថ្នាំព្យាបាលផ្លូវចិត្តតាំងពីលោកនៅក្មេងមកម្ល៉េះ» នេះបើតាមការទម្លាយពីមេធាវី៕
