នៅវេលាម៉ោងប្រមាណ ៥ និង ៥០ នាទីល្ងាចថ្ងៃទី ២០ ខែកក្កដា ឆ្នាំ ២០២៥ (ពេលវេលាក្នុងតំបន់) ព្យុះទីហ្វុង Wipha បានបោកបក់ដល់ប្រទេសចិនហើយក្បែរក្រុង Jiangmen ខេត្ត Guangdong នាំមកជាមួយនឹងកម្លាំងខ្យល់ដ៏ខ្លាំងក្លា។ ព្យុះទីហ្វុងទី ៦ ដែលវាយប្រហារប្រទេសចិនក្នុងឆ្នាំ ២០២៥ នេះដែរ គឺរំពឹងនឹងបន្តផ្លាស់ទៅភាគខាងលិច និង ភាគនិរតីប្រទេសក្នុងល្បឿនចន្លោះពី ២០-២៥ គីឡូម៉ែត្រក្នុងមួយម៉ោង។
តាមវីដេអូស្ដែងៗដែលបានបង្ហោះចែកចាយពាសពេញបណ្ដាញសង្គមក្នុងប្រទេសចិន បានបង្ហាញឱ្យឃើញពីកម្លាំងព្យុះ Wipha បោកបក់អមជាមួយភ្លៀងធ្លាក់យ៉ាងខ្លាំង បណ្ដាលឱ្យដើមឈើបាក់រលំ រីឯមនុស្សនៅតាមដងផ្លូវត្រូវប្រឹងក្រាបប្រឹងឈរតោងគ្នាទប់លំនឹងពីកម្លាំងខ្យល់បក់ ខណៈមនុស្សមួយចំនួនទៀតឃើញខ្យល់បោកប៉ើងលើផ្លូវដូចសំឡី។
គួរឱ្យដឹងថា មុនព្យុះបោកបក់មកដល់ ខេត្ត Guangdong ប្រទេសចិន បានត្រៀមខ្លួនយ៉ាងសកម្មក្នុងការឆ្លើយតបគ្រោះអាសន្នកម្រិតទី ៤ ចាប់ពីម៉ោង ៦ យប់ថ្ងៃទី ១៨ ខែកក្កដា ឆ្នាំ ២០២៥ កន្លងទៅ។ តំបន់ជាច្រើននៅខេត្ត Guangdong បានដាក់ចេញវិធានការណ៍បន្ទាន់ដូចជា ដឹកនាំទូកនេសាទឡើងមកផែវិញ នាំពលរដ្ឋឡើងលើគោក និង ជម្លៀសពលរដ្ឋចេញពីទីតាំងដែលមានគ្រោះថ្នាក់។
ជាក់ស្ដែង បើតាមនាយកដ្ឋានគ្រប់គ្រងគ្រោះអាសន្នប្រចាំខេត្ត Guangdong គិតត្រឹមម៉ោង ៨ ព្រឹកថ្ងៃទី ២០ ខែកក្កដា ខាងអាជ្ញាធរពាក់ព័ន្ធបានជម្លៀសពលរដ្ឋសរុបជាង ២៧ ម៉ឺននាក់ពាសពេញខេត្ត ទូកនេសាទជាង ៥០០ គ្រឿងនៅសមុទ្របានត្រឡប់មកផែវិញ និង ទីតាំងទេសចរណ៍ចំនួន ៥២ កន្លែងត្រូវបានផ្អាកបណ្ដោះអាសន្ន៕
