កាលពីយប់ថ្ងៃទី ១១ ខែវិច្ឆិកា ឆ្នាំ ២០២៥ កន្លងទៅ មានករណីភ្ញាក់ផ្អើលមួយកើតឡើងនៅសង្កាត់ Sri Racha ខេត្ត Chon Buri ដោយប៉ូលិសប៉ុស្តិ៍ Nong Kham ទទួលការរាយការណ៍ថា មានមនុស្ស ៥ នាក់ជាសមាជិកគ្រួសារក្នុងផ្ទះតែមួយ ត្រូវប្រទះឃើញស្លាប់ទាំងអស់នៅក្នុងផ្ទះរបស់ពួកគេ នៅភូមិ Nong Kham។
ជនរងគ្រោះដែលបានស្លាប់រួមមាន បុរសជាមេគ្រួសារអាយុ ៦២ ឆ្នាំ ស្ត្រីជាប្រពន្ធអាយុ ៦០ ឆ្នាំ កូនស្រីពួកគេម្នាក់អាយុ ២១ ឆ្នាំ ចៅស្រីអាយុ ១ ខួប និង ស្ត្រីចំណាស់ជាម្ដាយក្មេកអាយុ ៨២ ឆ្នាំ។
តាមការរៀបរាប់របស់អ្នកជិតខាងបានឱ្យដឹងថា ពួកគេមានការសង្ស័យដោយសារតែឃើញផ្ទះនោះបិទទ្វារ ២ ថ្ងៃ ដែលខុសប្លែកពីរាល់ដង ព្រោះបុរសជាប្ដីតែងតែទៅផ្សារលក់មឹក លក់គុយទាវជាប្រចាំ។ ពួកគេក៏ចាប់ផ្ដើមមានអារម្មណ៍មិនល្អ នៅពេលដែលធុំក្លិនស្អុយចេញពីក្នុងផ្ទះនោះ ទើបទាក់ទងរាយការណ៍ទៅប៉ូលិសតែម្ដង។
ក្រោយការស៊ើបអង្កេត ខាងអាជ្ញាធរជឿថា បុរសជាមេគ្រួសារគឺជាជនដៃដល់សម្លាប់សមាជិកគ្រួសារខ្លួនទាំងអស់ មុនសម្លាប់ខ្លួនឯងតាមក្រោយ។ អាជ្ញាធរសង្ស័យថា បុរសរូបនោះជួបវិបត្តិសេដ្ឋកិច្ចរហូតកើតស្ត្រេស និង រវើរវាយរហូតឈានដល់ការសម្លាប់ក្រុមគ្រួសារខ្លួនឯងបែបនេះ៕
ប្រភព៖ Khaosod English
