គូស្នេហ៍មួយគូនៅក្នុងខេត្ត Aceh ប្រទេសឥណ្ឌូនេស៊ីត្រូវបានកាត់ទោសទទួលការវាយចំនួន ១០០ រំពាត់ម្នាក់ ក្រោយលួចមានសម្ព័ន្ធភាពជាមួយគ្នាមុនរៀបការ បំពានច្បាប់តឹងរឹងរបស់អ៊ីស្លាម។
អាជ្ញាធរខេត្ត Aceh បានរៀបចំការពិន័យដោយរំពាត់ជាសាធារណៈមួយកាលពីថ្ងៃទី ០៤ ខែមិថុនា ឆ្នាំ ២០២៥ កន្លងទៅ នៅទីតាំងសួនមួយកន្លែងក្នុងក្រុង Banda Aceh។ ក្នុងការពិន័យនោះដែររួមមានការពិន័យលើគូស្នេហ៍មានសម្ព័ន្ធភាពផ្លូវភេទមុនរៀបការ អ្នកផឹកគ្រឿងស្រវឹង និង អ្នកលេងល្បែងអនឡាញ។
ចំពោះគូស្នេហ៍ដែលរកឃើញថាបានរួមភេទមុនរៀបការ ត្រូវបានពិន័យមុខមនុស្សម្នាជាច្រើនក្នុងម្នាក់ ១០០ រំពាត់ ខណៈមនុស្ស ៣ នាក់ផ្សេងទៀតដែលរកឃើញថាបានលេងល្បែង និង ផឹកគ្រឿងស្រវឹងត្រូវរងពិន័យសរុប ៤៩ រំពាត់។ ក្នុងការពិន័យនេះដែរ ខាងអាជ្ញាធរក៏មានរៀបចំបុគ្គលិកពេទ្យត្រៀមផងដែរ។
គួរឱ្យដឹងថា អ្នកឃ្លាំមើលសិទ្ធិមនុស្សអន្តរជាតិបានថ្កោលទោសថា ការដាក់ពិន័យខាងលើនេះជាអំពើឃោរឃៅ ប៉ុន្តែសម្រាប់ពលរដ្ឋរស់នៅក្នុងខេត្ត Aceh គឺពួកគេមានការគាំទ្រខ្លាំងទៅលើការពិន័យវាយដោយរំពាត់នេះទៅលើអ្នកដែលប្រព្រឹត្តបទល្មើសដូចដែលបានរៀបរាប់ខាងលើនេះ៕
ប្រភព៖ VN Express,Dailymail
