នៅទីបំផុត ប្រទេសថៃបានក្លាយជាប្រទេសដំបូងបំផុតនៅអាស៊ីអាគ្នេយ៍ដែលទទួលស្គាល់ និង ចេញច្បាប់អនុញ្ញាតការរៀបអាពាហ៍ពិពាហ៍រវាងអ្នកស្រឡាញ់ភេទដូចគ្នាជាផ្លូវការហើយកាលពីថ្ងៃទី ២៣ ខែមករា ឆ្នាំ ២០២៥ កន្លងទៅ។ ក្នុងថ្ងៃដំបូងនៃការប្រកាសចូលជាធរមាននៃច្បាប់អនុញ្ញាតការរៀបការរវាងអ្នកស្រឡាញ់ភេទដូចគ្នានេះដែរ ឃើញថាមានគូស្នេហ៍ភេទដូចគ្នារាប់រយនាក់ក្នុងប្រទេសថៃបាននាំគ្នារៀបការព្រោងព្រាតនៅទីក្រុងបាងកក ដោយមានការដឹកនាំដោយអតីតនាយករដ្ឋមន្ត្រី Srettha Thavisin រួមជាមួយរដ្ឋមន្ត្រីមួយចំនួនផ្សេងទៀតនៃគណៈរដ្ឋមន្ត្រីប្រទេសថៃ។
ជាមួយគ្នានេះដែរ លោកស្រីនាយករដ្ឋមន្ត្រីប្រចាំប្រទេសថៃ Paetongtarn Shinawatra ក៏បានផ្ញើវីដេអូមួយអបអរទៅកាន់គូស្នេហ៍ភេទដូចគ្នាទាំងនោះផងដែរ។ តាមការចេញផ្សាយរបស់សារព័ត៌មានក្នុងប្រទេសថៃបានឱ្យដឹងថា ការិយាល័យចុះអេតាស៊ីវិលទាំង ៨៧៨ ពាសពេញប្រទេសគឺត្រៀមខ្លួនរួចរាល់ក្នុងការផ្ដល់សេវាកម្មជូនគូស្នេហ៍ដែលមានភេទដូចគ្នា។ តាមឱ្យដឹង ចំនួនគូស្នេហ៍ភេទដូចគ្នាសរុបទាំងអស់ក្នុងប្រទេសថៃគឺរំពឹងថាអាចលើស ១៤៤៨ គូ ដែលជាចំនួនច្រើនបំផុតលើពិភពលោក ហើយជាមួយចំនួនគូស្នេហ៍ដ៏ច្រើនសន្ធឹកនេះ ខាងប្រទេសថៃក៏គ្រោងនឹងបញ្ជូនទិន្នន័យទៅខាង Guinness World Records ឱ្យមានការទទួលស្គាល់ជាផ្លូវការផងដែរ។
តាមសម្ដីគូស្នេហ៍ LGBT ដំបូងគេដែលចុះសំបុត្រអាពាហ៍ពិពាហ៍បានរៀបរាប់ថា៖ «ខ្ញុំមានអារម្មណ៍ស្មើភាព និង យុត្តិធម៌ហើយពេលនេះ យ៉ាងហោចណាស់ក៏លែងសូវមានគេរើសអើងដែរ។ ធ្លាប់ធំធាត់លូតលាស់ក្នុងពេលវេលាមួយដែលក្រុម LGBT ត្រូវមានគេមើលមកជាមនុស្សខុសគេ មិនចូលចំណោមគេ តែឥលូវពិតជាអស្ចារ្យមែនទែននៅពេលមានការប្រែប្រួលបែបនេះ»។ ដោយឡែកគូស្នេហ៍ភេទដូចគ្នាមួយគូទៀតក៏បានចែករំលែកអារម្មណ៍ដែរថា៖ «ខ្ញុំសង្ឃឹមថាមនុស្សគ្រប់គ្នាបញ្ឃប់ការកំណត់ក្ដីស្រឡាញ់ត្រឹមតែមនុស្សស្រី និង មនុស្សប្រុស។ មនុស្សគ្រប់ភេទទាំងអស់រួមទាំងក្រុម LGBT ក៏គួរតែទទួលបានស្នេហាដ៏ស្រស់បំព្រងមួយដែរ»៕
ប្រភព៖ Kenh14
