កម្រិតល្អងធូលីពុលគឺស្ថិតនៅក្នុងចំណុចក្រហម (ប៉ះពាល់សុខភាព) នៅឡើយនៅក្នុងខេត្តចំនួន ៤៤ ក្នុងចំណោមខេត្តទាំង ៧៧ នៅប្រទេសថៃ គិតត្រឹមព្រឹកថ្ងៃទី ២៣ ខែមករា ឆ្នាំ ២០២៥ នេះ ដោយក្នុងនោះមានតែខេត្តចំនួន ៦ ប៉ុណ្ណោះដែលរកឃើញមានគុណភាពខ្យល់ល្អ ឬ ល្អមធ្យម នេះបើតាមការចេញផ្សាយដោយសារព័ត៌មាន Bangkok Post។
ទីភ្នាក់ងារ Gistda បានរាយការណ៍បញ្ជាក់នៅវេលាម៉ោង ៨ ព្រឹកថ្ងៃទី ២៣ ខែមករា ឆ្នាំ ២០២៥ នេះថា ភាគល្អិតមិនធំជាង ២.៥ មីក្រូ ឬហៅថាធូលី PM 2.5 គឺស្ថិតក្នុងកម្រិតពណ៌ក្រហមនៅឡើយនៅក្នុងខេត្តចំនួន ៤៤ នៅប្រទេសថៃ និង ខេត្តចំនួន ២៧ ទៀតគឺស្ថិតក្នុងកម្រិតពណ៌ទឹកក្រូច។
គួររំឭកផងដែរថា កាលពីថ្ងៃទី ២១ ខែមករា ឆ្នាំ ២០២៥ កន្លងទៅ ខាងការិយាល័យផ្នែកអប់រំក្នុងប្រទេសថៃ បានចេញសេចក្ដីប្រកាសពីការបិទសាលារៀនចំនួន ៣៩ នៅទីក្រុងបាងកក ដោយសារកម្រិតខ្យល់ពុលកើនឡើងខ្លាំងរហូតអាចប៉ះពាល់ដល់សុខភាព។ ការប្រកាសបិទសាលារៀនមួយរយៈនេះផងដែរគឺដោយសារតែមានការព្រួយបារម្ភខ្លាំងទៅលើសុខុមាលភាពប្រជាជន ជាពិសេសគឺក្មេងៗតូចៗតែម្ដង៕
