បុរសម្នាក់នៅខេត្ត Henan ប្រទេសចិន មានជីវិតពោរពេញដោយក្ដីសុខ ទទួលបានចំណងដៃកូនៗចំនួន ៣ នាក់ ក្រោយរៀបការជាមួយមនុស្សស្រីដែលលោកស្រឡាញ់រយៈពេល ១៣ ឆ្នាំមកនេះ។ យ៉ាងណាមិញ ក្ដីសុខមួយនេះបានក្លាយទៅជាក្ដីឈឺចាប់ត្រឹមមួយប៉ប្រិចភ្នែក ក្រោយថ្មីៗនេះ រូបលោកបានរកឃើញថាកូនៗទាំង ៣ នាក់ដែលខំថែបីបាច់មកនេះ តាមពិតមិនមែនជាកូនបង្កើតរបស់លោកឡើយ។
ដើមហេតុនៃការសង្ស័យលើកូនៗផ្ទុះមានឡើងអំឡុងពេលដែលលោកមានជម្លោះទាស់ទែងជាមួយពូទី ២ របស់ខ្លួនពេលមកលេងផ្ទះ។ បន្ថែមពីលើនេះទៀត គំនិតកើនការសង្ស័យកាន់តែខ្លាំង នៅពេលអ្នកជិតខាងរបស់លោកសួរលោកថា អត់ដែលចាប់អារម្មណ៍ថា កូនស្រីច្បងមុខមាត់ដូចពូរបស់លោកទេឬ?
លោកក៏ចាប់ផ្ដើមសង្កេតមើលលើកូនៗ ហើយក៏ចាប់អារម្មណ៍ថាពិតជាមុខដូចពូរបស់ខ្លួនមែន។ អត់ធ្មត់ទៀតលែងបាន បុរសរូបនេះក៏បានលួចនាំកូនៗទៅពិនិត្យ DNA មើល ដោយលទ្ធផលចេញមកធ្វើឱ្យលោកធ្លាក់ថ្លើមជាខ្លាំង។ កូនៗទាំង ៣ នាក់នោះគឺពិតជាមិនមែនជាសាច់ឈាមបង្កើតរបស់លោកមែន។
លោកបានទៅប្រាប់ឱ្យពូរបស់ខ្លួនទៅពិនិត្យ DNA ដែរ តែពូរូបនោះបដិសេធមិនព្រមទៅ ហើយក្រឡេកទៅប្រពន្ធវិញបែរជាស្ងាត់មាត់មិននិយាយស្ដី។ ទ្រាំទៀតលែងបាន លោកក៏សម្រេចចិត្តដាក់ពាក្យលែងលះដោយទារសំណងជំងឺចិត្ត ១៥ ម៉ឺនយ័ន (ប្រមាណជាង ២ ម៉ឺនដុល្លារ) លើការផ្គត់ផ្គង់កូនៗកន្លងមក។
ដំបូងឡើយ ប្រពន្ធរបស់លោកបានបដិសេធ និង សម្រេចរើទៅរស់នៅជាមួយពូដែលជាសហាយនោះ។ ទោះជាយ៉ាងណា ក្រោយមកនាងក៏ព្រមសងជំងឺចិត្តដោយសុំបង់ប្រាក់ ១ ម៉ឺនយ័នរាល់ឆ្នាំ រយៈពេល ១៥ ឆ្នាំ៕
ប្រភព៖ World Of Buzz
