រឿងរ៉ាវរបស់នារីជាចៅហ្វាយលង់ស្នេហ៍បុរសជាកូនចៅ កំពុងផ្ទុះការចាប់អារម្មណ៍នៅចិន។ តាមព័ត៌មានបានឱ្យដឹងថា ស្ត្រីជាចៅហ្វាយនោះមានត្រកូល Zhou ជាអ្នកក្រុង Chongqing ប្រទេសចិន បានធ្លាក់ក្នុងអន្លង់ស្នេហ៍បុរសជាកូនចៅខ្លួនឯងឈ្មោះ Xia ដែលជាបុរសមានប្រពន្ធរួចហើយ។ ចំណងស្នេហ៍ចៅហ្វាយ និង កូនចៅនេះ គឺកើតឡើងចិត្តនឹងចិត្តផ្ដើមពីការទំនាក់ទំនងការងារជាមួយគ្នាប្រចាំថ្ងៃរហូតមានចិត្តថ្លើមស្រឡាញ់គ្នា។
ព័ត៌មានបានឱ្យដឹងទៀតថា តាមពិតទៅ ទាំងចៅហ្វាយស្រី Zhou និង កូនចៅប្រុស Xia ពួកគេសុទ្ធតែជាមនុស្សរៀបការមានប្ដីប្រពន្ធរៀងខ្លួន ប៉ុន្តែដោយសារតែភ្លើងស្នេហ៍កើតឡើងនៅអូហ្វិសជាមួយគ្នា ពួកគេក៏សម្រេចចិត្តទៅលែងលះគ្នាជាមួយគូស្នេហ៍ចាស់រៀងៗខ្លួន ដើម្បីមកកសាងគ្រួសារថ្មីរួមគ្នា។ បន្ថែមពីនេះ ក្រោយចៅហ្វាយស្រី Zhou លែងលះប្ដីរួចរាល់ហើយ និង ដើម្បីពន្លឿនយក Xia មកធ្វើជាប្ដីថ្មីឱ្យបានឆាប់ នាងក៏ផ្ដើមគំនិតផ្ញើលុយចំនួន ៣ លានយ័ន (ប្រមាណជាង ៤០ ម៉ឺនដុល្លារ) ទៅកាន់អតីតប្រពន្ធរបស់ Xia ជាថ្នូរនៃការលែងលះគ្នា និង ទុកសម្រាប់ផ្គត់ផ្គង់កូន រួមជាមួយថ្លៃចំណាយផ្សេងៗ។
យ៉ាងណាមិញ គម្រោងកសាងគ្រួសារថ្មីនេះបែរជាត្រូវក្រឡាប់ចាក់ ដោយក្រោយរួមរស់ជាមួយប្ដីក្រោយបានមួយរយៈ នាង Zhou ក៏មានអារម្មណ៍ថា នាង និង ប្ដី មិនចុះសម្រុងគ្នា ហើយក៏គិតចង់លែងលះ។ អ្វីដែលហួសចិត្តនោះគឺថា ដោយមិនសមបំណង នាងបានទៅដាក់ពាក្យប្ដឹង Xia និង អតីតប្រពន្ធគេ ទាមទារលុយ ៣ លានយ័ននោះមកវិញទៀតផង រហូតក្ដីក្ដាំឡើងដល់តុលាការដោះស្រាយ។
តុលាការដំបូងឡើយ បានសម្រេចកាត់ក្ដីថា លុយដែលទទួលបាននោះគឺបំពានសណ្ដាប់ធ្នាប់សាធារណៈ និង សីលធម៌សង្គម ជាអំណោយមិនត្រឹមត្រូវ និង បានបញ្ជាឱ្យអតីតប្រពន្ធរបស់ Xia សងទៅ Zhou វិញ។ ទោះជាយ៉ាងណា លោក Xia និង អតីតប្រពន្ធបានបដិសេធ និង ប្ដឹងឡើងឧទ្ធរណ៍។ នៅពេលនោះ តុលាការបានសម្រេចទៀតថា ភស្តុតាងដែលបានពីនាង Zhou បង្ហាញថា នាងមិនមានបំណងឱ្យលុយជាថ្នូរលែងលះទៅអតីតភរិយា Xia ទេ ប៉ុន្តែគឺជាលុយដែលនាងរ៉ាប់រងជំនួសលោក Xia លើថ្លៃផ្គត់ផ្គង់កូនៗ និង ការចំណាយក្រោយលែងលះគ្នា។
ដោយឡែក ការកាត់ក្ដីក៏បានផ្លាស់ប្ដូរ ដោយផ្អែកតាមគោលការណ៍ច្បាប់ «គ្មានការសងប្រាក់វិញក្រោមហេតុផលមិនត្រូវតាមច្បាប់» តុលាការក៏សម្រេចបដិសេធរាល់ការអះអាងរបស់នាង Zhou ដោយលោក Xia និង អតីតភរិយា មិនតម្រូវឱ្យសងលុយ ៣ លានយ័ននោះវិញឡើយ៕
