សារព័ត៌មាន The Sun បានចេញផ្សាយវីដេអូមួយដែលថតជាប់សកម្មភាពរបស់សត្វខ្លាខ្មៅមានវ័យចំណាស់មួយក្បាលដែលដើរអ៊ីកអ៊ាកៗមួយៗជុំវិញទ្រុងរបស់វានាសួនសត្វ Chengdu ខេត្ត Sichuan ប្រទេសចិន កំពុងធ្វើឱ្យមហាជនជាច្រើនផ្ទុះការចាប់អារម្មណ៍ជាខ្លាំង។ សត្វខ្លាខ្មៅដែលធ្លាប់ជាសត្វមានរូបរាងមាំអង់អាច តែខ្លាមួយក្បាលនេះវិញបែរជាមានសភាពធាត់ក្បាលពោះសុទ្ធតែខ្លាញ់ ធ្វើឱ្យជើងរបស់វាទ្រទម្ងន់ខ្លួនមិនចង់បានដើរទៅមុខមិនចង់រួច។
តាមរយៈវីដេអូដែលបង្ហោះនោះដែរ សត្វខ្លាខ្មៅមួយក្បាលនោះបានព្យាយាមពួននៅខាងក្រោយដើមឈើប៉ុន្តែដោយសារតែក្បាលពោះធំពេកធ្វើឱ្យវាពួនមិនជិតនោះឡើយ។ វីដេអូនោះដែរថតនៅសួនសត្វ Chengdu និង បានបង្ហោះចែកចាយលើបណ្ដាញសង្គមនៅថ្ងៃទី ០៩ ខែមីនា ឆ្នាំ ២០២៥ កន្លងទៅថ្មីៗនេះ រហូតមានការផ្ទុះវែកញែកប្រតិកម្មពីមហាជន។
មកដល់ថ្ងៃទី ១០ ខែមីនា ខាងអ្នកតំណាងសួនសត្វបានបកស្រាយទៅកាន់សារព័ត៌មានក្នុងស្រុកជុំវិញស្ថានភាពរបស់សត្វខ្លាខ្មៅនោះថា ខ្លាខ្មៅមួយក្បាលនោះជាសត្វខ្លាញី មានអាយុ ១៦ ឆ្នាំដែលអាយុនេះគឺពិតជាចាស់ណាស់សម្រាប់ខ្លាប្រភេទនេះ។ ខាងសួនសត្វបានលើកឡើងថា មុខងាររាងកាយ និង ការរំលាយអាហាររបស់សត្វខ្លានោះគឺបានថយចុះដោយសារអាយុរបស់វាទើបបណ្ដាលឱ្យរាងកាយវាប្រមូលផ្ដុំដោយខ្លាញ់លើសលប់បែបនេះ។
យ៉ាងណាមិញ ការបកស្រាយនេះដែរមិនបានធ្វើឱ្យប្រតិកម្មមហាជនថមថយនោះឡើយ ដោយមតិជាច្រើនបាននិយាយថាសត្វខ្លានោះរួមជាមួយសត្វមួយចំនួនផ្សេងទៀតនៅក្នុងសួនគឺសុទ្ធតែលើសទម្ងន់ដោយសារតែការឱ្យចំណីលើសខ្លាំងពេក។ ជាការឆ្លើយតបនឹងមតិរិះគន់ អ្នកថែសួនក៏បាននិយាយដែរថា៖ «ពួកយើងនឹងកាត់បន្ថយចំណីឱ្យទៅវា ដោយដំបូងយើងនឹងកាត់បន្ថយលើសាច់គោ និង អាហារផ្សេងៗទៀត»។ ការធ្វើបែបនេះគឺបំណងជួយឱ្យខ្លាខ្មៅនោះទទួលបានរូបរាងដើម និង សុខភាពល្អឡើងវិញ៕
