កាលពីថ្ងៃទី ១០ ខែកក្កដា ឆ្នាំ ២០២៥ កន្លងទៅ តុលាការកណ្ដាលក្រុងសេអ៊ូលបានសម្រេចកាត់ទោស Taeil អតីតសមាជិក្រុមចម្រៀង NCT ឱ្យជាប់ពន្ធនាគាររយៈពេល ៣ ឆ្នាំកន្លះ ពាក់ព័ន្ធករណីរំលោភលើនារីជាអ្នកទេសចរម្នាក់ ខណៈបក្សពួករបស់លោក ២ នាក់ទៀតក៏ទទួលការកាត់ទោសស្រដៀងគ្នានេះ។ បន្ថែមពីទោសជាប់ពន្ធនាគារ ពួកគេក៏ត្រូវតម្រូវឱ្យទទួលការសិក្សាលើបញ្ហាហិង្សាផ្លូវភេទរយៈពេល ៤០ ម៉ោងផងដែរ។
តាមរបាយការណ៍ព័ត៌មាននៅកូរ៉េខាងត្បូង ខាងចៅក្រមបានប្រកាសថា បទល្មើសនេះគឺមានលក្ខណៈធ្ងន់ធ្ងរណាស់ព្រោះជនទាំង ៣ បានកេងចំណេញលើជនរងគ្រោះដោយបញ្ច្រកគ្រឿងស្រវឹងនាងរហូតទោរទន់ខ្លាំង និង ធ្វើការរំលោភនាងទាំងដែលនាងមិនអាចតដៃបាន។ ចៅក្រមបានលើកឡើងថា៖ «ជនរងគ្រោះជាអ្នកទេសចរបរទេសដែលរងការបំពាននៅកន្លែងដែលនាងមិនធ្លាប់ស្គាល់ ហើយនាងទំនងជាទទួលរងបញ្ហាផ្លូវចិត្តធ្ងន់ធ្ងរ»។
យ៉ាងណាមិញ កត្តាមួយចំនួនផ្សេងទៀតក៏ត្រូវបានលើកឡើងមកពិចារណាលើការកាត់ក្ដីនេះ រួមមានកត្តាដែលជនទាំង ៣ ជាអ្នកប្រព្រឹត្តបទល្មើសលើកដំបូង ហើយក៏សារភាពទទួលស្គាល់បទល្មើសខ្លួនឯង និង បានដោះស្រាយជាមួយជនរងគ្រោះផងដែរ៕
ប្រភព៖ CNA
