កាលពីថ្ងៃទី ០៥ ខែធ្នូ ឆ្នាំ ២០២៤ កន្លងទៅថ្មីៗនេះ នាង Safiétou Kabengele លំដាប់រងទី ៣ Miss Grand International 2024 បានធ្វើឱ្យមានការផ្ទុះចាប់អារម្មណ៍ជាខ្លាំងក្រោយរូបនាងធ្វើការឆ្លើយសំនួររបស់អ្នកគាំទ្រពាក់ព័ន្ធនឹងទំនាក់ទំនងរវាងនាងជាមួយនឹងម្ចាស់មកុដ MGI 2024 នាង Rachel Gupta។
តាមរយៈការឆ្លើយតបលើផេកផ្លូវការរបស់នាង លំដាប់រងទី ៣ MGI រូបនេះបានរៀបរាប់ថា៖ «ជារឿងមិនល្អ Rachel បង្ហាញការមិនចេះគោរពចំពោះខ្ញុំនៅពីមុខ organizers និង បេក្ខភាពដទៃផ្សេងទៀត។ ខ្ញុំគ្មានការងារអីដែលត្រូវធ្វើពុតជាមានទំនាក់ទំនងល្អជាមួយមនុស្សដែលធ្វើឱ្យខ្ញុំឈឺចាប់នោះទេ។ ខ្ញុំនឹងនៅតែជាមនុស្សស្មោះត្រង់ ១០០% ជាមួយមនុស្សដែលខ្ញុំស្រឡាញ់ ហើយក៏គ្មាននរណាម្នាក់អាចបង្ខំខ្ញុំឱ្យធ្វើអ្វីដែលមិនមែនជាខ្លួនខ្ញុំនោះឡើយ មិនអាចសូម្បីតែនៅពីមុខកាមេរ៉ា»។
ការចេញមុខរិះគន់លើម្ចាស់មកុដ MGI 2024 ជាសាធារណៈនេះដែរ បានធ្វើឱ្យមហាជនជាច្រើនភ្ញាក់ផ្អើលជាខ្លាំងរហូតមានការផ្ទុះវែកញែកព្រោងព្រាតពីសំណាក់អ្នកគាំទ្រវិស័យបវរកញ្ញា។ ជាមួយគ្នានោះដែរ ការក្លាហានចេញមករិះគន់ម្ចាស់មកុដពីសំណាក់បវរកញ្ញាលំដាប់រងទី ៣ រូបនេះដែរ ក៏បានធ្វើឱ្យនាងទទួលរងការរិះគន់លើបណ្ដាញសង្គមជាច្រើនផងដែរដោយមហាជនជាច្រើនបានលើកឡើងថាបើទោះជាមានការប៉ះទង្គិចគ្នាយ៉ាងណាក៏ដោយ នាងក៏មិនគួរលើកយកមកនិយាយជាសាធារណៈបែបនេះដែរ។
ក្រោយមានការរិះគន់ បវរកញ្ញាតំណាងឱ្យប្រទេសបារាំង Safiétou Kabengele ក៏បានចេញមុខជាថ្មីដោយបញ្ជាក់ថា ការយល់ច្រឡំរវាងនាង និង នាង Rachel ត្រូវបានដោះស្រាយបញ្ចប់រឿងហើយកាលពីប៉ុន្មានសប្ដាហ៍មុន។ នាងបាននិយាយថា៖ «រឿងគ្រប់បែបយ៉ាងត្រូវបានដោះស្រាយដោយសន្តិវិធី ហើយពួកយើងក៏បញ្ចប់បញ្ហាប៉ះទង្គិចគ្នានេះរួចរាល់ហើយដែរ»។
បន្ថែមពីនេះ នាង Safiétou Kabengele ក៏ទទួលស្គាល់កំហុសផងដែរលើការលើករឿងរ៉ាវទាំងប៉ុន្មានយកមកនិយាយជាសាធារណៈបែបនេះ ដោយសារតែនាងជាមនុស្សត្រង់ពេក នាងគិតថាការឆ្លើយសំនួរនោះនឹងអាចដោះស្រាយជម្រះរឿងគ្រប់យ៉ាង ប៉ុន្តែវាបែរជាបង្កទៅជាបញ្ហាបែបនេះទៅវិញ។ នាងបានរៀបរាប់ថា៖ «ខ្ញុំតែងតែជាមនុស្សដែលឱ្យតម្លៃលើភាពស្មោះត្រង់ និង ថាមពលវិជ្ជមាន ប៉ុន្តែខ្ញុំទទួលបានមេរៀនថាការដែលយើងត្រង់ខ្លាំងក្លាពេកគឺមិនមែនជាជម្រើសល្អក្នុងការបង្ហាញលើបណ្ដាញសង្គមនោះឡើយ។ ខ្ញុំទទួលស្គាល់ថាខ្ញុំបង្កើតកំហុសមួយដោយការឆ្លើយតបសំនួរនេះជាសាធារណៈ»៕
ប្រភព៖ Kenh14
