ក្រុមហ៊ុន Apple បានសម្រេចលុបចោលកាយវិការដៃចាប់កាន់ទូរស័ព្ទពីពាណិជ្ជកម្មផ្សព្វផ្សាយពីកម្រាស់របស់ទូរស័ព្ទទំនើបថ្មី iPhone Air នៅក្នុងប្រទេសកូរ៉េខាងត្បូង ដោយសារតែការទទួលរងប្រតិកម្មមិនពេញចិត្តខ្លាំងពីសំណាក់ប្រុសៗនៅក្នុងប្រទេស។
ជាការពិតណាស់ ស្របពេលយុទ្ធនាការផ្សព្វផ្សាយជាសកលប្រើប្រាស់កាយវិការដៃចាប់កាន់ទូរស័ព្ទដើម្បីបង្ហាញពីកម្រាស់ដ៏ស្ដើងរបស់វា ងាកមកប្រទេសកូរ៉េខាងត្បូងវិញ គឺការផ្សព្វផ្សាយត្រូវបានលុបកាយវិការដៃនោះចោលដោយទុកបង្ហាញត្រឹមតែរូបភាពទូរស័ព្ទតែប៉ុណ្ណោះ។ បើតាម PetaPixel បានបញ្ជាក់ថា កាយវិការដៃដែលបង្ហាញក្នុងពាណិជ្ជកម្មរបស់ក្រុមហ៊ុន Apple នោះ នៅក្នុងប្រទេសកូរ៉េគេហៅថា «jibgeson» ដែលជាកាយវិការមិនសមរម្យ ជាញឹកញាប់តែងប្រើប្រាស់ដើម្បីលេងសើចចំអកចំអន់លើទំហំអាអូនតូចរបស់បុរសៗក្នុងប្រទេស។
ដោយសារតែកាយវិការដៃនេះហើយ ពេលបង្ហាញដំបូងនៅក្នុងប្រទេសកូរ៉េ និង តាមបណ្ដាញសង្គម គឺទទួលរងប្រតិកម្មយ៉ាងខ្លាំង រហូតមនុស្សជាច្រើននាំគ្នាធ្វើពហិកាមិនទិញទូរស័ព្ទទំនើបថ្មីនេះទៀតផង ទើបខាងក្រុមហ៊ុនក្រោយមកសម្រេចលុបចោលកាយវិការដៃនោះចេញ ទុកត្រឹមតែរូបរាងទូរស័ព្ទតែប៉ុណ្ណោះ៕
ប្រភព៖ 9GAG
