រដ្ឋាភិបាកក្រុង Delhi ប្រទេសឥណ្ឌា រំពឹងនឹងដាក់ចេញច្បាប់ថ្មីឱ្យងាកមកប្រើប្រាស់យានជំនិះប្រើថាមពលអគ្គិសនីវិញ និង លុបបំបាត់ការប្រើប្រាស់យានជំនិះគ្រប់ប្រភេទដែលប្រើប្រាស់សាំង និង ម៉ាសូត ក្នុងបំណងកាត់បន្ថយការបំពុលបរិយាកាស និង កែលម្អសុខភាពសាធារណៈ។ ច្បាប់ថ្មីដែលលើកឡើងនេះដែរ គឺគ្រោងនឹងធ្វើការហាមប្រាមការប្រើប្រាស់រ៉ឹម៉កកង់បីប្រើសាំងចាប់ពីខែសីហា ឆ្នាំ ២០២៥ នេះទៅ ខណៈយានជំនិះកង់ ២ រំពឹងនឹងអនុវត្តចាប់ពីខែសីហា ឆ្នាំ ២០២៦ ទៅ។ បន្ថែមពីនេះ រាល់យានជំនិះទី ៣ ក្នុងគ្រួសារតែមួយទិញយកប្រើប្រាស់នឹងតម្រូវឱ្យទិញជាយានប្រើប្រាស់អគ្គិសនីវិញ។
តាមការចេញផ្សាយដោយសារព័ត៌មាន Hindustan Times រដ្ឋមន្ត្រីក្រសួងការដឹកជញ្ជូនប្រចាំក្រុង Delhi លោក Pankaj Kumar Singh បានយល់ព្រមលើសំណើរបង្កើតច្បាប់ថ្មីនេះហើយ ដោយបច្ចុប្បន្នរង់ចាំតែខាងគណៈរដ្ឋមន្ត្រីអនុម័តប៉ុណ្ណោះ។ ច្បាប់ថ្មីនេះដែរបង្កើតឡើងក្នុងបំណងផ្ដោតចម្បងទៅលើការផ្លាស់ប្ដូរទៅប្រើប្រាស់យានជំនិះគ្រប់ប្រភេទដោយប្រើប្រាស់តែថាមពលអគ្គិសនីប៉ុណ្ណោះ។
ក្រោមច្បាប់ថ្មីនេះដែរ យានជំនិះកង់ ២ ដោយប្រើប្រាស់សាំង ម៉ាសូត ឬ CNG នឹងមិនត្រូវចុះក្នុងបញ្ជីនៅក្រុង Delhi ឡើយចាប់ពីខែសីហា ឆ្នាំ ២០២៦ ទៅ ហើយចំពោះយានជំនិះប្រើប្រាស់ CNG ដែលចាស់ជាង ១០ ឆ្នាំនឹងត្រូវប្ដូរទៅជាយានជំនិះប្រើប្រាស់អគ្គិសនី ឬ upgrade វាយ៉ាងមិចឱ្យស្របទៅនឹងតម្រូវការនៃច្បាប់ថ្មីនោះ។
ដោយឡែក ចាប់ពីខែសីហា ឆ្នាំ ២០២៥ នេះទៅ រ៉ឺម៉កកង់ ៣ ឬឡានដឹកទំនិញនានាដែលប្រើប្រាស់ CNG នឹងត្រូវបានហាមប្រាម ហើយចំពោះអាជ្ញាប័ណ្ណយានយន្ត CNG ដែលមានស្រាប់គឺនឹងមិនត្រូវធ្វើថ្មីឱ្យនោះឡើយ ដោយជំនួសមកវិញនូវអាជ្ញាប័ណ្ណថ្មីដែលផ្លាស់ប្ដូរទៅជាយានប្រើប្រាស់អគ្គិសនីវិញ។ រហូតដល់ឆ្នាំ ២០២៧ រាល់ឡានដឹកសំរាមទាំងអស់ក៏នឹងត្រូវផ្លាស់ទៅជាឡានប្រើប្រាស់អគ្គិសនីដូចគ្នាដែរ។
បន្ថែមពីនេះ ខាងរដ្ឋាភិបាកក៏ពង្រីកបន្ថែមនូវចំនួនឡានក្រុងអគ្គិសនីដោយចំនួនសរុបអាចដល់ប្រមាណ ៣ ពាន់គ្រឿងនៅត្រឹមចុងឆ្នាំ ២០២៥ នេះ។ រាល់យានជំនិះថ្មីដែលទិញដោយរដ្ឋាភិបាលនឹងតម្រូវឱ្យជារថយន្តប្រើប្រាស់អគ្គិសនីទាំងអស់។ ជាជំនួយលើគោលនយោបាយថ្មីនេះ ខាងក្រុងក៏មានគម្រោងដាក់បន្ថែមនូវស្ថានីយសាកថ្មជាង ១៣២០០ កន្លែងពាសពេញទាំងក្រុង ដោយធានាថារាល់ចម្ងាយ ៥ គីឡូម៉ែត្រនឹងមានស្ថានីយសាកថ្មមួយ។
គួរបញ្ជាក់ថា គោលនយោបាយថ្មីនេះគឺផ្ដោតគោលដៅឱ្យក្រុង Delhi ក្លាយជាក្រុងមានការប្រើប្រាស់យានជំនិះអគ្គិសនី ៩៥% ត្រឹមឆ្នាំ ២០២៧ ឱ្យកើនដល់ ៩៨% ត្រឹមឆ្នាំ ២០៣០។ គោលនយោបាយកាលពីមុនគឺចង់ឱ្យសម្រេចបាន ២៥% ត្រឹមឆ្នាំ ២០២៤ ប៉ុន្តែភាពជោគជ័យទទួលបានគឺត្រឹម ១៣-១៤% ប៉ុណ្ណោះ៕
ប្រភព៖ Kenh14
