ចាប់ពីឆ្នាំ ២០២៥ នេះទៅ ទីក្រុង Leuven ប្រទេសបែលហ្ស៊ិក បានដាក់ចេញបទបញ្ជាដ៏តឹងរឹងថ្មីមួយទៅលើអ្នកដែលប្រើប្រាស់ទូរស័ព្ទអំឡុងពេលបើកបរ។ វិធានការដ៏តឹងរឹងថ្មីនេះដែរគឺធ្វើឡើងជំនួសយុទ្ធនាការឃោសនាចាស់ ក្នុងគោលបំណងកាត់បន្ថយគ្រោះថ្នាក់ចរាចរណ៍ដោយខ្វះការយកចិត្តទុកដាក់តាមដងផ្លូវ។
ក្រោមបទបញ្ជាថ្មីនេះដែរ នឹងដាក់ធ្វើឡើងផ្លូវការចាប់ពីខែនេះទៅ ហើយចំពោះជនណាដែលល្មើសច្បាប់នេះនឹងត្រូវដកហូតប័ណ្ណបើកបររយៈពេល ១៥ ថ្ងៃ រួមជាមួយនឹងការពិន័យជាសាច់ប្រាក់។ ករណីអ្នកបើកបរជំនាញល្មើសច្បាប់ នឹងត្រូវបង្ហាញខ្លួនក្នុងតុលាការ និង អាចប្រឈមការពិន័យរហូតដល់ជិត ៤ ពាន់ដុល្លារ។
គួរឱ្យដឹងថា តាមការបញ្ជាក់ពីប៉ូលិសប្រទេសបែលហ្ស៊ិក ជារៀងរាល់ឆ្នាំ ប្រទេសនេះមានអ្នករងរបួសប្រមាណ ៤៥០០ នាក់ និង អ្នកស្លាប់ ៥០ នាក់ពាក់ព័ន្ធនឹងការធ្វេសប្រហែសបើកបរបណ្ដើរមើលទូរស័ព្ទបណ្ដើរ។ ការដាក់ចេញបទបញ្ជាតឹងរឹងថ្មីនៅក្រុង Leuven នេះដែរ រំពឹងថានឹងអាចជួយដាស់តឿនដល់អ្នកបើកបរក្នុងប្រទេសទាំងអស់ឱ្យចូលរួមសហការ ដើម្បីកាត់បន្ថយគ្រោះថ្នាក់ចរាចរណ៍ដោយការមិនផ្ចង់អារម្មណ៍ពេលកំពុងបើកបរ៕
ប្រភព៖ Kenh14
