នៅថ្ងៃទី ០៥ ខែឧសភា ឆ្នាំ ២០២៥ (ពេលវេលាក្នុងតំបន់) រដ្ឋ Texas សហរដ្ឋអាមេរិក បានរងការវាយប្រហារដោយគ្រោះរញ្ជួយដិជាច្រើនដងក្នុងរយៈពេលត្រឹម ៣ ម៉ោង។ តាមស្ថិតិភូមិសាស្ត្រអាមេរិក (UGS) បានកត់ត្រាការរញ្ជួយនៅផ្នែកភាគខាងលិចនៃរដ្ឋនេះ ដោយកម្រិតខ្ពស់បំផុតគឺ ៣.៦ រ៉ិចទ័រ ដែលវាយប្រហារនៅរយៈចម្ងាយប្រមាណ ៥៦ គីឡូម៉ែត្រភាគខាងត្បូងក្រុង Whites City រដ្ឋ New Mexico។
គ្រោះរញ្ជួយដីតូចៗ ២ ផ្សេងទៀត រកឃើញកើតមានឡើងនៅភាគឦសានរដ្ឋ ក្នុងកម្រិត ២.៧ និង ២.៨ រ៉ិចទ័រ។ គ្រោះរញ្ជួយដីទាំងនេះដែរកើតមានឡើងត្រឹមមួយថ្ងៃក្រោយខាងភ្នាក់ងារស្ទាបស្ទង់ភូមិសាស្ត្រសហរដ្ឋអាមេរិក USGS កត់ត្រាគ្រោះរញ្ជួយដីកម្រិតធ្ងន់ ៥.៤ រ៉ិចទ័រក្នុងតំបន់តែមួយកាលពីថ្ងៃទី ០៤ ខែឧសភា ឆ្នាំ ២០២៥ កន្លងទៅ។ មិនមានរបាយការណ៍បញ្ជាក់ពីការស្លាប់ ឬខូចខាតដោយគ្រោះរញ្ជួយដីនេះឡើយ។
គួរឱ្យដឹងថា រដ្ឋ Texas គឺល្បីល្បាញខាងការបំបែកថ្មដោយសម្ពាធ (Fracking) ដើម្បីយកប្រេង។ ដំណើរការរបស់គេធ្វើឡើងដោយប្រើប្រាស់សម្ពាធពីទឹក សារធាតុគីមី និង ខ្សាច់ទម្លុះចូលថ្មដើម្បីបំបែកយកប្រេងនៅខាងក្នុង។ ដំណើរការ Fracking ជាធម្មតាមិនមែនជាកត្តាចម្បងបង្កឱ្យមានគ្រោះរញ្ជួយដីកើតឡើងនោះឡើយ ប៉ុន្តែដំណើរការចោលកាកសំណល់មិនបានល្អ ប៉ះពាល់ដល់ស្រទាប់ថ្មគឺអាចបង្កឱ្យមានគ្រោះរញ្ជួយដីបាន៕
ប្រភព៖ Dailymail
