កាលពីសប្ដាហ៍កន្លងទៅ មន្ត្រីរដ្ឋាភិបាលជាតួអង្គ AI ដំបូងគេបំផុតលើពិភពលោក ឈ្មោះ «Diella» បានធ្វើការថ្លែងសុន្ទរកថាឡើងកាន់តំណែងរបស់ខ្លួននៅក្នុងរដ្ឋសភាប្រទេសអាល់បានី។ Diella ត្រូវបានលោកនាយករដ្ឋមន្ត្រី Edi Rama ប្រកាសតែងតាំងឱ្យធ្វើជារដ្ឋមន្ត្រីក្រសួងលទ្ធកម្មសាធារណៈ។
យ៉ាងណាមិញ ការប្រកាសតែងតាំងមនុស្សសិប្បនិម្មិតឱ្យមានតួនាទីជាមន្ត្រីរដ្ឋាភិបាលនេះដែរ គឺទទួលបានការរិះគន់មិនពេញចិត្ត និង ផ្ទុះកំហឹងខ្លាំងពីសំណាក់សមាជិកសភាមួយចំនួនក្នុងប្រទេស។ ជាក់ស្ដែង អំឡុងពេលធ្វើកម្មវិធីឡើងកាន់តំណែងនៅរដ្ឋសភានោះ គឺកើតមានភាពចលាចលពីខាងភាគីប្រឆាំង ដោយពួកគេបានគប់ដបទឹកសុទ្ធ និង របស់របរនៅលើតុប្រជុំទៅលើលោកនាយករដ្ឋមន្ត្រី និង គណៈរដ្ឋមន្ត្រីរបស់លោក ដោយលើកឡើងថាការតែងតាំង AI ជារដ្ឋមន្ត្រីមួយរូបនេះគឺប្រាសចាកពីច្បាប់រដ្ឋធម្មនុញ្ញ។
ដោយឡែក រដ្ឋមន្ត្រី AI «Diella» ក៏បានធ្វើការឆ្លើយតបទៅនឹងមតិរិះគន់នោះភ្លាមៗថា៖ «អ្នកខ្លះហៅខ្ញុំថា មិនត្រូវច្បាប់រដ្ឋធម្មនុញ្ញ ព្រោះតែខ្ញុំមិនមែនជាមនុស្សពិតប្រាកដ។ ខ្ញុំសុំរំឭកអ្នករាល់គ្នាថា គ្រោះថ្នាក់ដ៏ពិតប្រាកដសម្រាប់រដ្ឋធម្មនុញ្ញគឺមិនមែនជាគ្រឿងម៉ាស៊ីននោះទេ ប៉ុន្តែជាការសម្រេចចិត្តដែលគ្មានភាពជាមនុស្សរបស់អ្នកកាន់អំណាចទាំងនោះ»។
គួរឱ្យដឹងថា ដំបូងឡើយ លោកនាយករដ្ឋមន្ត្រី Rama លើកគំនិតបង្កើត concept រដ្ឋមន្ត្រី AI មួយ ដើម្បីជាសញ្ញាកាយវិកា កត់បញ្ជាក់ពីតម្រូវការដោះស្រាយអំពើពុករលួយ ដែលជាបញ្ហាចម្បងក្នុងប្រទេសអាល់បានីដើម្បីអាចចូលរួមជាមួយសហភាពអឺរ៉ុប។ យ៉ាងណាមិញ អ្វីបានផ្លាស់ប្ដូរដោយមិនរំពឹងទុកភ្លាមៗ ដោយលោកនាយករដ្ឋមន្ត្រីបានធ្វើការប្រកាស Diella ឱ្យឡើងកាន់តំណែងជារដ្ឋមន្ត្រីជាផ្លូវការ ដោយផ្ដល់សិទ្ធិអំណាចពេញលេញក្នុងការគ្រប់គ្រងផ្នែកលទ្ធកម្មសាធារណៈ។ លោក Rama បានអះអាងថា ការសម្រេចចិត្តនេះនឹងធ្វើឱ្យដំណើរការរដ្ឋាភិបាល លែងមានភាពពុករលួយ ១០០%។
ទោះជាយ៉ាងណា មិនទល់ពេលនេះ តួនាទីរបស់ Diella គឺមានកំណត់នៅឡើយ ដោយត្រឹមឱ្យធ្វើការលើដំណើរការឯកសារឌីជីថល និង សម្របសម្រួលទំនាក់ទំនងរវាងប្រជាពលរដ្ឋ និង ការិយាល័យរដ្ឋ៕
ប្រភព៖ 9GAG
