នៅវេលាម៉ោងប្រមាណ ១ និង ២៤ នាទីរសៀលថ្ងៃទី ១៩ ខែធ្នូ ឆ្នាំ ២០២៤ នេះ (ពេលវេលាក្នុងតំបន់) មានករណីអគ្គិភ័យមួយបានឆាបឆេះឃ្លាំងក្នុងផ្សារទំនើបមួយកន្លែងនៅស្រុក Dadu តំបន់ Taichung កោះតៃវ៉ាន់ ជះអណ្ដាតភ្លើងសាយភាយផ្សែងយ៉ាងខ្មៅខ្មួលខ្មាញ់គួរឱ្យរន្ធត់ជាទីបំផុត។
តាមរយៈរូបភាព និង វីដេអូនៅកន្លែងកើតហេតុបានបង្ហាញឱ្យឃើញផ្សែងខ្មៅក្រាស់ឃ្មឹកសាយភាយចេញពីក្នុងឃ្លាំង ដោយសូម្បីតែនៅរយៈចម្ងាយរាប់គីឡូក៏នៅតែអាចមើលឃើញយ៉ាងច្បាស់ដែរ។ ព័ត៌មានបឋមទទួលបាននៅពេលនេះ មានមនុស្សប្រមាណជា ២០ នាក់ដែលជាបុគ្គលិកនៅទីនោះកំពុងជាប់គាំងនៅខាងក្នុងនៅឡើយ ហើយស្ថានភាពពួកគេយ៉ាងណានោះក៏មិនទាន់បានដឹងនោះដែរ។
ប៉ូលិស និង ខាងក្រុមពន្លត់អគ្គិភ័យត្រូវបានទាក់ទងឱ្យចុះមកអន្តរាគមន៍ភ្លាមៗ ដោយពួកគេកំពុងស្ទុះស្ទាពន្លត់ភ្លើង ខណៈមួយចំនួនទៀតក៏ស្វះស្វែងរុករកជនរងគ្រោះដែលជាប់នៅទីនោះ។ ចំពោះមូលហេតុបង្កជាការឆាបឆេះវិញ ខាងអាជ្ញាធរកំពុងដាក់ការស៊ើបអង្កេតនៅឡើយ៕
