ថ្មីៗកន្លងទៅនេះ ក្រុមចម្រៀងដ៏ល្បី Coldplay បានធ្វើការប្រគំន្ត្រីមួយនៅក្រុង Boston សហរដ្ឋអាមេរិក។ យ៉ាងណាមិញ លោក Chris Martin ដែលជា lead singer ប្រចាំក្រុម ស្រាប់តែបានក្លាយជាប្រធានបទក្ដៅគគុកពាសពេញបណ្ដាសារព័ត៌មាននានា ក្រោយពេលរូបលោកបានលេងសើចជាមួយនឹងវីដេអូ «kiss cam» មួយអំឡុងពេលធ្វើការប្រគំតន្ត្រីនោះ។
ជាក់ស្ដែង ខណៈកំពុងធ្វើការប្រគំតន្ត្រី កាមេរ៉ា kiss cam ក៏បានចាប់ចំលោក Andy Byron ដែលជាមហាសេដ្ឋីបច្ចេកវិទ្យា ជា CEO ក្រុមហ៊ុន Astronomer កំពុងឈរឱបពីក្រោយស្ត្រីម្នាក់ដែលគេជឿថាជាប្រធានផ្នែកធនធានមនុស្សរបស់ក្រុមហ៊ុន។ ក្រោយក្រឡេកឃើញកាមេរ៉ាបញ្ចាំងលើអេក្រង់ដែលមានមនុស្សកំពុងមើលរាប់ពាន់នាក់ មហាសេដ្ឋី Andy ក៏បានប្រញាប់ក្រាបចុះ ខណៈស្ត្រីរូបនោះព្យាយាមងាកមុខចេញ ពេលនោះហើយដែល Chris Martin បាននិយាយលេងសើចថា៖ «ខ្ញុំគិតថាពួកគេទាំងពីរអាចកំពុងលួចទាក់ទងគ្នា ឬក៏កំពុងអៀន»។
ហេតុការណ៍មួយនេះដែរក៏បានក្លាយជាប្រធានបទដ៏ក្ដៅគគុកភ្លាមៗ ដោយមហាជនជាច្រើនបានស្គាល់អត្តសញ្ញាណបុគ្គលទាំងពីររូបនោះ ហើយពួកគេក៏ដឹងដែរថាទាំងលោក Andy Byron និង ស្ត្រីជាកូនចៅនោះគឺសុទ្ធតែរៀបការមានប្ដីប្រពន្ធរៀងៗខ្លួន។ ដូច្នេះហើយគឺកាន់តែធ្វើឱ្យគេសង្ស័យថា CEO លុយពាន់លានរូបនេះគឺកំពុងតែលួចផិតជាមួយនឹងបុគ្គលិកខ្លួនឯង។
យ៉ាងណាមិញ បច្ចុប្បន្នទាំងលោក Andy Byron និង ស្ត្រីសង្ស័យជាស្រីស្នេហ៍គឺមិនទាន់ចេញមុខបកស្រាយជុំវិញហេតុការណ៍ដែលបានកើតឡើងនោះឡើយ ប៉ុន្តែមហាជនបានកត់សម្គាល់ឃើញថា ភរិយារបស់លោក Andy គឺបានលុបត្រកូលរបស់លោកចេញពីឈ្មោះផេកផ្ទាល់ខ្លួនរបស់នាង ក្រោយវីដេអូបែកធ្លាយនោះផ្ទុះផ្អើលពាសពេញបណ្ដាញសង្គម និង សារព័ត៌មាន៕
