ក្ដៅដូចទឹកពុះលើចង្ក្រាន! នារីចោទប្រកាន់ Lee Yi Kyung ចេញមកទម្លាយភស្តុតាងបន្ថែម បន្ទាប់ពីខាងក្រុមហ៊ុនចេញបដិសេធ

ខណៈក្រុមហ៊ុនរបស់តារាសម្ដែង Lee Yi Kyung ចេញមកបដិសេធរាល់ការទម្លាយរបស់នារីម្នាក់ពាក់ព័ន្ធនឹងជីវិតផ្ទាល់ខ្លួនរបស់លោក ឥលូវនេះខាងនារីរូបនោះមិនបញ្ចប់ងាយៗឡើយ ដោយរូបនាងបានចេញមកទម្លាយភស្តុតាងបន្ថែមទៀត។

ជាការពិតណាស់ កាលពីថ្ងៃទី ២០ ខែតុលា ឆ្នាំ ២០២៥ កន្លងទៅ នារីម្នាក់ដែលគេដាក់ឈ្មោះឱ្យថា «A» បានបង្ហោះលើ blog មួយ បកអាក្រាតពីជីវិតឯកជនរបស់តារាសម្ដែងប្រុស Lee Yi Kyung ដោយចោទប្រកាន់តារាប្រុសរូបនេះមានអត្តចរិតមិនល្អ រួមមកបង្ហាញជាមួយរូបភាព និង screenshot សារឆ្លើយឆ្លងគ្នារវាង និង គណនីមនុស្សប្រុសម្នាក់ដែលនាងអះអាងថាជា Lee Yi Kyung។

យ៉ាងណាមិញ ក្រោយខាងក្រុមហ៊ុនរបស់ Lee Yi Kyung ចេញមកបដិសេធភ្លាមៗ ការបង្ហោះដំបូងរបស់ A ក៏ត្រូវបានលុបចោលវិញ ប៉ុន្តែរូបនាងក៏បានចេញមកធ្វើការបង្ហោះមួយថ្មីទៀត អមដោយភស្តុតាងបន្ថែម។ ការបង្ហោះរបស់នារីរូបនោះបានរៀបរាប់ថា៖

«សួស្ដី! នេះគឺជាគណនីដែលបង្ហោះពី Lee Yi Kyung មុននេះ។ ក្រឡេកមើលលើការឆ្លើយតប ខ្ញុំក៏ឃើញថាគ្រប់គ្នាលើកឡើងថាខ្ញុំធ្វើដើម្បីចង់បានលុយ? ខ្ញុំពិតជាភ្ញាក់ផ្អើល ព្រោះតែនេះជាលើកទីមួយហើយដែលខ្ញុំឮការនិយាយមកខ្ញុំបែបនេះ។ មែន! ខ្ញុំពិតជាបានសុំលុយគាត់ម្ដងមែន ខ្ញុំមានបញ្ហាលុយកាក់ និង មិនអាចសុំឪពុកម្ដាយរបស់ខ្ញុំបានឡើយ ប៉ុន្តែខ្ញុំមិនបានទទួលលុយអ្វីពីគាត់ឡើយ ហើយពួកយើងនៅតែទាក់ទងគ្នាដូចធម្មតា។ វាពិតជាឈឺចិត្តណាស់ពេលសុំគេបែបនេះ វាពិតជាមិនស្រណុកនោះឡើយ ព្រោះខ្ញុំមិនដែលធ្លាប់ការជួយពីនរណាម្នាក់ឡើយ ជាពិសេសរឿងលុយនេះតែម្ដង។ ខ្ញុំក៏មិនដែលសុំលុយគាត់ទៀតដែរ ហើយការបង្ហោះរបស់ខ្ញុំកាលពីម្សិលមិញនេះក៏មិនមែនដើម្បីសុំលុយនោះដែរ ប៉ុន្តែខ្ញុំគ្រាន់តែចង់ការពារមនុស្សស្រីផ្សេងទៀតកុំឱ្យក្លាយជាជនរងគ្រោះដោយពាក្យសម្ដីមិនសមរម្យរបស់គាត់។

ភាសាកូរ៉េខ្ញុំគឺមិនត្រូវប៉ុន្មាននោះទេ ព្រោះតែខ្ញុំរៀនវាដោយខ្លួនឯងរយៈពេល ៨ ឆ្នាំ ដោយមិនធ្លាប់ចូលរៀនក្នុងសាលា ឬតាមសៀវភៅណាឡើយ។ ខ្ញុំមិនមែនជាជនបោកប្រាស់ឡើយ ខ្ញុំគឺជាជនជាតិអាល្លឺម៉ង់ពិតប្រាកដ។ ខ្ញុំសុំទោសចំពោះពាក្យសរសេរមើលទៅចម្លែកៗ។ ខ្ញុំមិនអាចអានគ្រប់យ៉ាងនោះទេ ព្រោះខ្ញុំកំពុងនៅកន្លែងធ្វើការ ប៉ុន្តែខ្ញុំសង្ឃឹមថានឹងមិនមានការយល់ច្រឡំអ្វីឡើយ ហើយខ្ញុំសង្ឃឹមថាអ្នកនឹងមិនរំខានជីវិតឯកជនរបស់ខ្ញុំ។ ខ្ញុំមិនដឹងថារឿងនេះនឹងក្លាយជាបញ្ហាធំបែបនេះឡើយ»។

នារី «A» ក៏បាន screen recording video គណនីផ្លូវការរបស់ Lee Yi Kyung ផងដែរ។ បច្ចុប្បន្ន ខាងតារាសម្ដែង Lee Ki Kyung និង ភ្នាក់ងាររបស់លោកមិនទាន់ចេញការឆ្លើយតបចំពោះការបង្ហោះថ្មីនេះនៅឡើយទេ៕

ប្រភព៖ Koreaboo