កាលពីថ្ងៃទី ១៨ ខែមិថុនា ឆ្នាំ ២០២៥ កន្លងទៅ Taeil អតីតសមាជិកក្រុមចម្រៀងកូរ៉េ NCT របស់ផលិតកម្ម SM បានសារភាពទទួលស្គាល់ថា រូបលោកពិតជាបានប្រព្រឹត្តបទល្មើសរំលោភលើនារីទេសចរម្នាក់កាលពីឆ្នាំទៅមែន ខណៈខាងព្រះរាជអាជ្ញាស្នើសុំឱ្យកាត់ទោសលោកជាប់ពន្ធនាគាររយៈពេល ៧ ឆ្នាំ។
អំឡុងពេលឡើងសវនាការលើកដំបូងនៅតុលាការកណ្ដាលក្រុងសេអ៊ូល លោក Taeil និង បក្សពួក ២ រូបផ្សេងទៀត គឺបានប្រព្រឹត្តបទល្មើសរំលោភសេពសន្ថវៈ (special quasi-rape)។ បទរំលោភប្រភេទនេះដែរគឺអនុវត្តឡើងនៅពេលមនុស្ស ២ ឬច្រើននាក់ពាក់ព័ន្ធនឹងទង្វើបំពានផ្លូវភេទលើនរណាម្នាក់ក្នុងស្ថានភាពជនរងគ្រោះមិនដឹងខ្លួន ឬមិនអាចប្រឆាំងទប់ទល់បាន។ ប្រសិនបើរកឃើញថា ជនជាប់ចោទពិតជាបានប្រព្រឹត្តបទល្មើសនេះមែន នោះរូបគេប្រឈមនឹងការជាប់ពន្ធនាគារពី ៧ ឆ្នាំ ទៅមួយជីវិត។
ករណី Taeil គឺលោកពិតជាទទួលស្គាល់ថាខ្លួនពិតជាបានប្រព្រឹត្តបទល្មើសទាំងនេះមែន ខណៈបក្សពួករបស់លោក ២ នាក់ផ្សេងទៀតក៏ព្រមទទួលស្គាល់ដូចគ្នា។ គួរបញ្ជាក់ថា ចំពោះការកាត់ក្ដីកាត់ទោស Taeil និង បក្សពួកជាផ្លូវការ ខាងតុលាករនឹងធ្វើឡើងនៅថ្ងៃទី ១០ ខែកក្កដា ឆ្នាំ ២០២៥ ខាងមុខនេះ។
គួររំឭកថា Taeil និង មិត្តភក្តិរបស់លោក បានជួបជាមួយស្ត្រីជនជាតិចិនម្នាក់នៅ Itaewon ក្រុងសេអ៊ូល ប្រទេសកូរ៉េខាងត្បូង កាលពីខែមិថុនា ឆ្នាំ ២០២៤ កន្លងទៅ។ ពួកគេបានផឹកជាមួយគ្នា ដោយក្រោយមកស្ត្រីរងគ្រោះក៏ស្រវឹងខ្លាំងជោគជាំ ហើយ Taeil ក៏បានជួយនាំនាងចេញពីបា ដាក់នាងក្នុងឡានតាក់ស៊ីជាមួយនឹងបក្សពួករបស់លោកម្នាក់ដែលគេស្គាល់ឈ្មោះថា Lee ជិះដឹកនាងយកទៅផ្ទះរបស់ជនឈ្មោះ Lee នោះ។ Taeil ជាមួយមិត្តម្នាក់ផ្សេងទៀតឈ្មោះ Hong ក៏ទៅតាមក្រោយជាមួយឡានមួយគ្រឿងផ្សេងទៀត។ សកម្មភាព និង ការបំពានទាំងប៉ុន្មានគឺកើតមានឡើងក្នុងផ្ទះរបស់ជនបង្កឈ្មោះ Lee នោះតែម្ដង៕
ប្រភព៖ The Korea Herald
