បុរសៗនៅប្រទេសជប៉ុនជាច្រើន រាប់ចាប់ពីបុគ្គលិកក្រុមហ៊ុនរហូតដល់សិស្សសាលា បាននាំគ្នាចំណាយប្រាក់ទៅសាឡនឱ្យគេតុបតែងខ្លួន ផាត់មុខមាត់ធ្វើជាមនុស្សស្រី ដើម្បីគេចពីសម្ពាធការងារ និង ជីវិត បានមួយរយៈ។
ជាក់ស្ដែង តាមរយៈការបញ្ជាក់ពីហាងសាឡនមួយឈ្មោះ Raar នៅសង្កាត់ Shinjuku ក្រុងតូក្យូ បានឱ្យដឹងថា ហាងរបស់ខ្លួនថ្មីៗនេះមានភ្ញៀវបុកចូលមកច្រើនមែនទែន។ ក្នុងតម្លៃ ៧ ពាន់យេន (ខ្ទង់ ៤៧ ដុល្លារ) ភ្ញៀវទាំងអស់អាចប្រែកាយខ្លួនឯងទៅជាមនុស្សស្រីតាមស្ទីលដែលខ្លួនចូលចិត្ត ចង់បានបែបគួរឱ្យស្រឡាញ់ (sweet Lolita) ក៏បាន ឬចង់បានបែបមនុស្សសុភាពស្រស់ស្អាតបែបធម្មជាតិក៏បាន ដោយក្នុងហាងមានឈុតសម្លៀកបំពាក់ឱ្យជ្រើសរើសដល់ជាង ១ ពាន់ឈុតឯណោះ។
បន្ថែមពីលើការតុបតែងខ្លួន និង ផាត់មុខមាត់ ខាងសាឡនក៏មានផ្ដល់ជម្រើសសេវាមួយចំនួនបន្ថែមទៀតផងដែរ ដូចជា សេវាថតរូប និង របៀបលើកដៃជើងថតឱ្យដូចមនុស្សស្រី។
ហាងសាឡន Raar បានបញ្ជាក់បន្ថែមទៀតថា គិតត្រឹមតែមួយខែឧសភា ខាងសាឡនមានភ្ញៀវចូលដល់ ៤០០ នាក់ ដោយភ្ញៀវរបស់ពួកគេរាប់ចាប់ពីអ្នកធ្វើការខាងច្បាប់ CEOs គ្រូពេទ្យ និង សិស្ស។ តាមម្ចាស់សាឡន បានប្រាប់ថា ភ្ញៀវទាំងនោះមកទទួលសេវាកម្មនេះ ដើម្បីអាចគេចចេញពីសម្ពាធតួនាទីការងារ តួនាទីក្នុងគ្រួសារ និង ភេទជាមនុស្សប្រុសនេះ មួយរយៈ៕
