កំពុងផ្ទុះចាប់អារម្មណ៍ខ្លាំង! ឆ្កែចចកដាច់ពូជប្រមាណ ១២០០០ ឆ្នាំមុន ត្រូវអ្នកវិទ្យាសាស្ត្របង្កើតឡើងវិញបានដោយជោគជ័យ

ជារឿងដ៏អស្ចារ្យ និង កំពុងធ្វើឱ្យមនុស្សជាច្រើនចាប់អារម្មណ៍ជាខ្លាំង ក្រោយអ្នកវិទ្យាសាស្ត្របានប្រកាសបង្កើតបានឡើងវិញនូវពូជឆ្កែចចកដ៏កម្រ Dire Wolf ដែលបានផុតពូជទៅអស់ប្រមាណជាង ១ ម៉ឺនឆ្នាំមកនេះ។

ក្រុមហ៊ុនវិស្វកម្មហ្សែន Colossal Biosciences ទទួលបានជោគជ័យក្នុងការបង្កើតបានកូនឆ្កែចចកពូជ Dire Wolf ចំនួន ៣ ក្បាលដោយដាក់ឈ្មោះឱ្យថា Romulus, Remus និង Khaleesi ទៅតាមស្ថាបនិករឿងនិទាននៃក្រុងរ៉ូម និង តាមតួឯកស្រីក្នុងរឿងដ៏ល្បី «Game of Thrones»។ តាមក្រុមហ៊ុនបានបញ្ជាក់ថា ពួកគេបានទាញយក DNA ពីផូស៊ីលចំនួន ២ របស់ពូជឆ្កែចចកដែលផុតពូជនេះ ដោយមួយទាញយកពីធ្មេញដែលមានអាយុកាលប្រមាណ ១៣០០០ ឆ្នាំ និង មួយទៀតយកពីលលាដិ៍ក្បាលដែលមានអាយុកាលប្រមាណ ៧២០០០ ឆ្នាំ។

ក្រុមហ៊ុនបានយក DNA ដែលទាញយកបានទាំងនោះទៅបញ្ជូលគ្នាជាមួយកូដហ្សែនរបស់ឆ្កែចចកប្រផេះ ដែលជាពូជជិតស្និទ្ធជាងគេបំផុតជាមួយនឹង Dire Wolf។ ក្រោយមក ពួកគេក៏បានធ្វើការក្លូនខ្សែកោសិកាដែលមានគុណភាពខ្ពស់ ប្រើប្រាស់ស្នូលកោសិកា somatic បញ្ជូនទៅក្នុងកោសិកាពងដែលយកមកប្រើជំនួស (DNA ដើមរបស់ពងត្រូវបានដកចេញ) បង្កើតទៅជាអំប្រ៊ីយ៉ុងមុនបញ្ចូលទៅក្នុងខ្លួនសត្វដែលពពោះជំនួស និង ជាលទ្ធផលក៏បានបង្កើតបានកូនឆ្កែពូជ Dire Wolf ដែលមានសុខភាពល្អចំនួន ៣ ក្បាល កាលពីខែតុលា ឆ្នាំ ២០២៤ កន្លងទៅ៕

ទស្សនាវីដេអូនៅទីនេះ