តាមការបញ្ជាក់ពីខាងមន្ត្រីការពារជាតិកូរ៉េខាងត្បូងនៅថ្ងៃទី ០៧ ខែមីនា ឆ្នាំ ២០២៥ នេះបានឱ្យដឹងថា ចំនួនអ្នករងរបួសសរុបក្នុងហេតុការណ៍ទម្លាក់គ្រាប់ពិតខុសគោលដៅកាលពីថ្ងៃទី ០៦ ខែមីនា ឆ្នាំ ២០២៥ កន្លងទៅបានកើនដល់ ២៩ នាក់ហើយ ដោយក្នុងនោះរួមមានពលរដ្ឋចំនួន ១៥ នាក់ និង កងទាហាន ១៤ នាក់។ ក្នុងចំណោមជនរងគ្រោះទាំងអស់មាន ២ នាក់រងរបួសធ្ងន់ ដោយម្នាក់បញ្ជូនទៅព្យាបាលនៅពេទ្យ Capital Military Hospital និង ម្នាក់ទៀតបញ្ជូនទៅសង្គ្រោះនៅមន្ទីរពេទ្យ Uijengbu St. Mary’s Hospital។
មន្ត្រីប្រចាំកូរ៉េខាងត្បូងបាននិយាយថា៖ «ជនរងគ្រោះមួយចំនួនមានអាការហឹងត្រចៀក និង ឈឹក្បាល» ស្របពេលកើតចម្ងល់ថាហេតុអ្វីបានជាចំនួនជនរងគ្រោះកើនឡើងទ្វេដងពីចំនួនទទួលបានបឋម។ យ៉ាងណាមិញ ក្រោយមកខាងកងទ័ពកូរ៉េក៏បានបញ្ជូនក្រុមគ្រូពេទ្យទៅដឹកជនរងគ្រោះទៅព្យាបាលនៅមណ្ឌលសុខភាព។
គួររំឭកថា កាលពីថ្ងៃទី ០៦ ខែមីនា ឆ្នាំ ២០២៥ កន្លងទៅ យន្តហោះចម្បាំងចំនួន ២ គ្រឿងបានជួបបញ្ហាបច្ចេកទេសទម្លាក់គ្រាប់ចំនួន ៨ លើតំបន់ពលរដ្ឋរស់នៅអំឡុងពេលធ្វើសមយុទ្ធ។ ហេតុការណ៍នេះដែរកើតមានឡើងនៅវេលាម៉ោងប្រមាណ ១០ និង ០៤ នាទីព្រឹក (ពេលវេលាក្នុងតំបន់) ដោយយន្តហោះចម្បាំង KF-16 បានធ្វើការហាត់សមយុទ្ធទម្លាក់គ្រាប់ពិតនៅក្រុង Pocheon ជិតព្រំប្រទល់ប្រទេសកូរ៉េខាងជើង។ កងទ័ពអាកាសប្រទេសកូរ៉េខាងត្បូងបានលើកឡើងដែរថា ពួកគេនឹងធ្វើការស៊ើបអង្កេតលើហេតុការណ៍មួយនេះ និង បានធ្វើការសុំទោសពលរដ្ឋចំពោះការខូចខាតរួមទាំងសន្យានឹងផ្ដល់សំណងទៅអ្នកដែលប៉ះពាល់ផងដែរ៕
