យ៉ាងហោចណាស់មនុស្ស ៦៩៤ នាក់បានស្លាប់ និង ជិត ១៧០០ នាក់បានរងរបួស ក្រោយគ្រោះរញ្ជួយដីកម្រិត ៧.៧ រ៉ិចទ័រវាយប្រហារភាគកណ្ដាលប្រទេសមីយ៉ាន់ម៉ា កាលពីថ្ងៃទី ២៨ ខែមីនា ឆ្នាំ ២០២៥ កន្លងទៅ។
តាមការបញ្ជាក់ពីខាងភ្នាក់ងារស្ទាបស្ទង់ភូមិសាស្ត្រអាមេរិក (USGS) នៅថ្ងៃទី ២៩ ខែមីនា ឆ្នាំ ២០២៥ នេះបានឱ្យដឹងថា ប្រទេសមីយ៉ាន់ម៉ាបានទទួលរងការរញ្ជួយជាបន្តបន្ទាប់យ៉ាងហោចណាស់ ១៤ លើកបន្ថែមពីគ្រោះរញ្ជួយដីធំ ៧.៧ រ៉ិចទ័រ កាលពីថ្ងៃទី ២៨ កន្លងទៅ ដែលជាហេតុធ្វើឱ្យបេសកកម្មរុករកសង្គ្រោះជនរងគ្រោះមានការលំបាកខ្លាំង។
ចំនួនអ្នកស្លាប់បឋមដែលទទួលបានពីគ្រោះរញ្ជួយដីនៅមីយ៉ាន់ម៉ាបានហក់ឡើងលឿនមែនទែនពី ១៤៤ នាក់ទៅ ៦៩៤ នាក់ក្នុងពេលត្រឹមតែមួយយប់ ហើយតាមមន្ត្រីក្នុងប្រទេសបានបញ្ជាក់ទៀតថា មនុស្ស ១៦៧០ នាក់បានរងរបួស និង ៦៨ នាក់កំពុងបាត់ខ្លួន ដោយចំនួនអ្នកស្លាប់រំពឹងថានឹងកើនឡើងថែមទៀត៕
