ក្រសួងសុខាភិបាលសាធារណៈនៅប្រទេសថៃ បានបង្កើនការប្រុងប្រយ័ត្នកាន់តែខ្ពស់ជាងមុនលើវីរុសកូវីដ-១៩ បំប្លែងខ្លួនថ្មី XEC ខណៈឥលូវនេះមានសមត្ថភាពឆ្លងលឿនខ្លាំងជាងវីរុសផ្ដាសាយធម្មតាដល់ទៅ ៧ ដង។
លោក Somsak Thepsuthin រដ្ឋមន្ត្រីក្រសួងសុខាភិបាល បានបង្វែធនធាន និង ពលកម្មមនុស្សទៅការពារក្រុមមនុស្សងាយរងគ្រោះវិញ ខណៈកំពុងតាមដានយ៉ាងយកចិត្តទុកដាក់លើការរាលដាលឆ្លងកូវីដនេះនៅក្នុងសាលារៀន។ លោក Somsak បាននិយាយថាចាប់តាំងពីថ្ងៃទី ០១ ខែមករា ឆ្នាំ ២០២៥ មក ប្រទេសថៃបានឈានចូលសប្ដាហ៍ទី ២១ ជាផ្លូវការហើយលើការដាក់ចេញវិធានការគ្រប់គ្រងលើជំងឺមួយនេះ។ គិតមកទល់ពេលនេះ ករណីឆ្លងកូវីដ XEC មានចំនួន ១០៨ ៨៩១ ករណី និង ស្លាប់ ២៧ ករណី។ ករណីស្លាប់ក្នុងឆ្នាំនេះ បានប៉ះពាល់យ៉ាងចម្បងលើក្រុមមនុស្ស «608 group» ដោយក្នុងនោះរួមមានមនុស្សចាស់ ៨០%។ ចំពោះកុមារក៏ត្រូវបានប៉ះពាល់ដោយវីរុសនេះផងដែរ។
គួរបញ្ជាក់ដែរថា ខណៈវីរុសបំប្លែងខ្លួនថ្មីនេះមិនសូវជាមានអាការធ្ងន់ធ្ងរខ្លាំងក៏ពិតមែន ប៉ុន្តែការរាលដាលឆ្លងយ៉ាងរហ័សរបស់វាគឺបង្កហានិភ័យខ្ពស់ដល់ពលរដ្ឋដែលងាយរងគ្រោះ។ ក្នុងនោះដែរ បើទោះជាអត្រាមរណៈមានកម្រិតទាបក៏ដោយ តែខាងអាជ្ញាធរនៅតែយកចិត្តទុកដាក់ខ្លាំងបំផុតលើចំណាត់ការការពារ និង បញ្ចៀសការរាលដាលឆ្លង។ ជាក់ស្ដែង រដ្ឋបាលក្រុងបាងកក បានជម្រុញឱ្យខាងសាលារៀនទាំងអស់ត្រួតពិនិត្យដោយយកចិត្តទុកដាក់លើការផ្ទុះឆ្លងជាចង្កោមលើសិស្សក្នុងសាលា។
គួររំឭកថា កាលពីសប្ដាហ៍មុន ប្រទេសថៃបានរកឃើញអ្នកឆ្លងកូវីដចំនួន ៤៣ ២១៣ ករណី ដោយចំនួននេះរាប់គិតទាំងអ្នកព្យាបាលនៅផ្ទះ និង នៅមន្ទីរពេទ្យ។ ជាមួយគ្នានោះ ក៏រកឃើញមានអ្នកស្លាប់ ៣ ករណីបន្ថែមផងដែរនៅខេត្ត Kanchanaburi នៅ Sukhothai និង នៅសង្កាត់ Noi ក្រុងបាងកក៕
ប្រភព៖ Bangkok Post
