រដ្ឋសភាប្រទេសកូរ៉េខាងត្បូង ថ្មីៗនេះបានសម្រេចអនុម័តលើច្បាប់ថ្មីហាមប្រាមសិស្សមិនឱ្យប្រើប្រាស់ទូរស័ព្ទក្នុងថ្នាក់ ដោយរំពឹងនឹងចាប់អនុវត្តធ្វើពីខែមីនា ឆ្នាំ ២០២៦ ទៅ។
ច្បាប់ថ្មីនេះដែរបានអនុម័តផ្លូវការកាលពីថ្ងៃទី ២៧ ខែសីហា ឆ្នាំ ២០២៥ កន្លងទៅ ដោយទទួលបានការបោះឆ្នោតគាំទ្រចំនួន ១១៥ សំឡេងក្នុងចំណោមសមាជិកសភាដែលចូលរួមចំនួន ១៦៣ នាក់។ សមាជិកសភា ឪពុកម្ដាយ ក៏ដូចជាគ្រូៗបានលើកឡើងថា ការប្រើប្រាស់ទូរស័ព្ទគឺធ្វើឱ្យខូចដល់ការសិក្សា និង ទាញយកពេលវេលាដែលគួរតែចាយលើការសិក្សា។ យ៉ាងណាមិញ ច្បាប់ហាមប្រាមនេះដែរក៏បង្កជាការមន្ទិលសង្ស័យពីសំណាក់មហាជនរួមទាំងសិស្សសាលាផងដែរ ដែលពួកគេលើកឡើងថាតើការហាមប្រាមនេះពិតជាអាចដោះស្រាយបញ្ហាឫសគល់នៃការញៀនលេងទូរស័ព្ទមែនឬក៏អត់។
គួរឱ្យដឹងផងដែរថា ប្រទេសកូរ៉េខាងត្បូងមិនមែនជាប្រទេសទីមួយឡើយដែលបានដាក់ចេញច្បាប់ហាមប្រាមការប្រើប្រាស់ទូរស័ព្ទក្នុងថ្នាក់នេះ។ ជាក់ស្ដែង នៅប្រទេសហ្វាំងឡង់ និង បារាំង ក៏ដាក់ចេញច្បាប់នេះដូចគ្នាដោយភាគច្រើនផ្ដោតលើថ្នាក់កម្រិតបឋម។ ដោយឡែក សម្រាប់ប្រទេសអ៊ីតាលី ហូរឡង់ និង ចិន វិញ គឺចេញការរឹតបន្ដឹងលើការប្រើប្រាស់ទូរស័ព្ទនៅគ្រប់កម្រិតគ្រប់ថ្នាក់ទាំងអស់៕
