កូនអើយកូន! តូចចិត្តជាមួយម្ដាយរត់ទៅចូលម៉ាស៊ីនបោកខោអាវ មានអីចេញវិញអត់រួច រវល់ដល់ក្រុមសង្គ្រោះចុះមកជួយ

ហេតុការណ៍ដ៏ហួសចិត្តមួយបានកើតមានឡើងក្នុងប្រទេសចិនកាលពីថ្ងៃទី ៣០ ខែមីនា ឆ្នាំ ២០២៥ កន្លងទៅ ដោយមានក្មេងស្រីអាយុ ១២ ឆ្នាំម្នាក់នៅតំបន់ Kunshan ខេត្ត Jiangsu ត្រូវម្ដាយស្ដីបន្ទោសរឿងធ្វើកិច្ចការផ្ទះអត់ចប់ទាន់ពេល ក៏អន់ចិត្តខឹង រត់ទៅចូលក្នុងម៉ាស៊ីនបោកខោអាវដើម្បីបន្ថយកំហឹង ប៉ុន្តែបែរជាវេទនាខ្លួនព្រោះតែចេញវិញលែងរួច។

នាងព្យាយាមរើខ្លួនចេញដែរ តែនៅតែមិនអាចចេញបាន ដល់ជម្រើសចុងក្រោយម្ដាយបានទាក់ទងទៅខាងក្រុមសង្គ្រោះឱ្យចុះមកជួយ។ ក្រុមសង្គ្រោះបានមកដល់បានព្យាយាមជួយយកនាងចេញ ប៉ុន្តែដោយសារតែតួក្នុងម៉ាស៊ីនបោកខាអាវនោះតូចពេកទាញនាងចេញមកមិនបាន ទើបខាងក្រុមសង្គ្រោះសម្រេចរើដោះម៉ាស៊ីនចេញជាផ្នែកៗតែម្ដង។

ពួកគេបានយកកន្សែងរុំក្មេងស្រីនោះដើម្បីការពារនាង បន្ទាប់មកក៏ប្រើទួណឺវីសដោះសំបកម៉ាស៊ីនខាងក្រៅចេញ ហើយក៏ប្រើឧបករណ៍កាត់មកកាត់ម៉ាស៊ីនបោកខោអាវដោយប្រុងប្រយ័ត្នបំផុតជៀសវាងបង្ករបួសដល់ក្មេងស្រីរងគ្រោះ។ ចុងក្រោយ ពួកគេក៏សង្គ្រោះនាងចេញពីម៉ាស៊ីនបោកខោអាវបានដោយជោគជ័យ៕